Dünən Milli Məclisdə Azərbaycan Respublikası və Müqəddəs Taxt-tac arasında ölkəmizdəki Katolik kilsəsinin hüquqi statusu haqqında saziş təsdiqləndi. Saziş haqqında məlumat verən Milli Məclisin insan haqları komitəsinin sədri Rəbiyyət Aslanova ölkədə dini tolerantlığın yüksək səviyyədə olmasından danışdı.
Onun sözlərinə görə, Azərbaycan hökumətinin məhz Katolik kilsə ilə saziş imzalaması digər dini cərəyanların gücsüz olması demək deyil. Sadəcə, Müqəddəs Taxt-tac bütün dünya ölkələri ilə bu cür saziş imzaladığına görə Azərbaycan tərəfi də bu prosesə qoşulub. Deputat hesab edir ki, bu sazişin təsdiqlənməsi Azərbaycanın dini dözümlülüyünün nümayişidir.
Rəbiyyət Aslanova xatırlatdı ki, Azərbaycanda 2008-ci il martın 16-da Müqəddəs Məryəm kilsəsinin açılışı baş tutub. Açılış mərasimində Katolik kilsəsinin nümayəndələri iştirak ediblər. İndi də həmin kilsə öz hüquqi statusunu almış olur.
Sazişdə qeyd olunur ki, bu sənəd Azərbaycan Respublikası və Müqəddəs Taxt-tac arasında mövcud münasibətləri dostluq ruhunda gücləndirmək və inkişaf etdirmək üçün hazırlanıb. Saziş Azərbaycanda katolik dininə aşkar etiqad etmək və ayinləri yerinə yetirmək azadlığına təminat verir. Sənəd həmçinin Katolik kilsəsinə öz dini səlahiyyəti daxilində missiyasını yerinə yetirmək hüququ verir. Azərbaycan tərəfi də öz növbəsində kilsənin bütün təsisatlarının hüquqi subyektlərini tanıyır və qeydiyyata alır.
Saziş bu il aprelin 29-da imzalanıb.
|
