"Rəsmi dövlət qəzetlərində, eləcə də digər media quruluşlarında çalışanlara dövlət qulluqçusu statusu verilə bilər. Hətta bu yöndə qanunvericilik aktı qəbul edilə bilər, bu məsələ istisna deyil". Bu fikri mətbuata açıqlamasında parlamentin Sosial siyasət komitəsinin sədri Hadı Rəcəbli bildirib.
Deputatın sözlərinə görə, digər peşələrdə çalışan insanlar kimi dövlət büdcəsindən maliyyələşən yazılı və elektron media quruluşlarında işləyənlərə, xüsusilə jurnalistlərə də dövlət qulluqçusu statusunun şamil olunması mümkündür. Hadı Rəcəbli hesab edir ki, Milli Məclisin orqanı olan "Azərbaycan" qəzeti, təsisçisi Prezident Administrasiyasının İşlər İdarəsi olan "Xalq qəzeti" işçilərinə parlamentin və ali icra hakimiyyəti orqanının əməkdaşları statusunu vermək olar:
"Bundan başqa digər media quruluşları var ki, onlar da büdcədən maliyyələşirlər və bu baxımdan gələcəkdə onlara da belə bir status verilə bilər, bu, mümkündür. Burada elə bir problemli məsələ görmürəm".
H.Rəcəbli qeyd edir ki, özəl müəssisələrdə çalışanlarla dövlət qurumlarında işləyənlərin əməkhaqları arasında fərqlər də aradan qaldırılmalı, burada uyğunluq olmalıdır. "Qeyri-dövlət sektorunda əməkhaqqı yüksəkdir. Ona görə də dövlətdən özəl sektora axın var. Hesab edirəm ki, zaman keçdikcə burada da yaxınlıq olmalıdır".
Komitə sədri etiraf edir ki, bəzi dövlət qurumlarında işləyən insanlar yüksək maaş alır. Bəzən onların əməkhaqqının məbləği 1600-1700 manata çatır:
"Məsələn, SOCAR-da işləyənlər də bu qədər maaş alır, Nazirlər Kabinetində, bəzi nazirliklərdə. Digər qurumlar, aşağı dövlət strukturlarında da belə yüksək əməkhaqqı olmalıdır ki, dövlət sektorundan özəl sektora axın olmasın. Əks təqdirdə, gələcəkdə dövlət sektorunda savadlı, peşəkar mütəxəssislər tapmaq olmaz".
|
