Bu ilin iyun ayında Azərbaycan, Ermənistan və Rusiya prezidentlərinin üçtərəfli görüşü gözlənilir. ANS TV-nin məlumatına görə, bu barədə Azərbaycanın xarici işlər naziri Elmar Məmmədyarov məlumat verib.
"Həmsədrlərin regiona növbəti səfəri iyun ayının əvvəlinə nəzərdə tutulub. Bu səfərdən sonra Rusiyanın paytaxtı Moskvada Azərbaycan, Rusiya və Ermənistan xarici işlər nazirlərinin görüşü planlaşdırılır. Bu görüşdən sonra isə iyun ayında hər üç ölkənin dövlət başçıları görüşməlidirlər. Prezidentlərin görüşlərinin harada keçirilməsi ilə bağlı təkliflər olsa da, hələ ki, dəqiq yer müəyyənləşdirilməyib", - deyə nazir bildirib.
Xatırladaq ki, Azərbaycan və Ermənistan prezidentlərinin sonuncu görüşü bu ilin mart ayının 5-də Soçi şəhərində Rusiya prezidentinin iştirakı ilə keçirilib.
Məmmədyarov eyni zamanda qeyd edib ki, Azərbaycan tərəfi ilkin mərhələdə Ermənistan qoşunlarının işğal olunmuş Ağdam və Füzuli rayonlarından, daha sonra isə digər rayonlardan da çıxarılmasını istəyir. O, snayperlərin qoşunların təmas xəttindən çəkilməsi məsələsinə Ermənistan qoşunlarının işğal altında olan rayonlardan çıxarılması kontekstində baxılmalı olduğunu qeyd edib.
"Ermənilər deyir ki, snayperləri çıxarın. Bunlar gülməli sözlərdir. Snayper özü-özünə gəlməyib ki, çıxarılsın. Əsas məsələ Ermənistan qoşunlarının işğal altında olan torpaqlarda olmasıdır. Biz plana əsasən, hansısa bir cədvəllə təsdiq olunmuş şəkildə Ermənistan qoşunlarının çıxarılmasına nail olmalıyıq. Ona görə də biz müzakirə edirik. Yəni biz sülh sazişi bağlayaq, yoxsa regiona sülh və stabillik gətirmək üçün bundan əvvəl hərəkətə keçək, addım-addım məsələsi ilə biz münaqişəni həll edək. İlk mərhələdə əlbəttə ki, işğal olunmuş torpaqlardan erməni qoşunları çıxmalıdır. İndi hansı rayondan, məsələn, Ağdam, Füzuli və ya Zəngilandan başlamalıyıq? Çox güman ki, biz Ağdam və Füzulidən başlamalıyıq. Bu, bizim mövqemizdir. Amma o biri baxımdan irəli sürülən digər bir təklifə görə, ermənilər 5 rayonu birdən boşaltmalıdır. Yəni təkliflər, razılaşdırılmış məqamlar çoxdur", - deyə E.Məmmədyarov bildirib.
|
