Azərbaycan və Avropa Parlamenti arasında əməkdaşlığın davam etdirilməsi hər iki tərəf üçün çox faydalı olacaq. Bunu Avropa Parlamentinin sədri Yerji Buzek Azərbaycana səfərinin yekunlarına dair keçirdiyi mətbuat konfransında bəyan edib.
APA-nın məlumatına görə, Y.Buzek qeyd edib ki, bir günlük səfəri çərçivəsində Bakıda səmərəli görüşlər keçirib. Azərbaycanın da iştirak etdiyi "Evronest" Parlament Assambleyasının (PA) yaradılmasını dəstəklədiyini qeyd edən qonaq bu prosesi alqışladığını deyib: "Belə bir strukturun yaradılması regional parlament əməkdaşlığı üçün yaxşı zəmin yaradacaq".
O, Azərbaycanın nailiyyətlərini sevinclə qarşıladıqlarını, bununla belə, islahatların davam etdirilməsinin zəruriliyini diqqətə çatdırıb: "Azərbaycanda azad, müstəqil media, söz və özünü ifadə etmək azadlıqlarının təkmilləşdirilməsinə ehtiyac var. Mən bütün görüşlərimdə bu məsələlərə toxundum".
Y.Buzek Avropa Parlamentinin Azərbaycanla bağlı son qətnaməsinin də görüşlərdə müzakirə mövzusu olduğunu söyləyib: "Biz görüşlərdə yalnız mövqelərimizin üst-üstə düşdüyü məsələlərdən danışmadıq, tərəfləri narahat edən məsələləri də müzakirə etdik. Tərəfdaşlar arasında onları narahat edən məsələləri müzakirə etmək isə normaldır. Görüşlərimizdə inkişafına ehtiyac duyduğumuz məsələlərlə bağlı da fikir mübadiləsi apardıq".
AP prezidenti "Eurovision" müsabiqəsində qələbə münasibətilə Azərbaycanı bir daha təbrik edib: "Bu müsabiqədə qalib gəlmək çox mühümdür. Çünki bu, çox məşhur müsabiqədir".
Y. Buzek Azərbaycanın müstəqilliyi və suverenliyinin Avropa İttifaqı üçün çox vacib olduğunu xüsusi vurğulayıb.
Dağlıq Qarabağ münaqişəsinə toxunan qonaq bütün münaqişə tərəflərinin problemin həlli üçün səylərini ortaya qoymalı olduğunu vurğulayıb. Aİ-nin münaqişənin həlli ilə bağlı danışıqlar prosesində iştirak etmədiyini bildirən Y.Buzek bununla belə, AP və Aİ-nin ATƏT-in Minsk Qrupunun problemin həlli istiqamətində səylərini dəstəklədiyini deyib. O, AP və Aİ-nin münaqişə tərəfləri arasında qarşılıqlı etimadın gücləndirilməsi məsələsinə yardım edə biləcəyini söyləyib.
Y.Buzek İrəvana səfəri zamanı da bu məsələləri Ermənistan rəsmilərinin diqqətinə çatdırdığını söyləyib.
Qeyd edək ki, Azərbaycan prezidenti İlham Əliyev dünən qonağı qəbul edib. Görüşdə Azərbaycan ilə Avropa İttifaqı, Avropa Parlamenti arasında əməkdaşlığın hazırkı vəziyyəti və perspektivləri ətrafında fikir mübadiləsi aparılıb, Avropa Parlamentinin sədri Yerji Buzekin ölkəmizə səfərinin əlaqələrimizin daha da genişləndirilməsi baxımından əhəmiyyəti qeyd olunub.
Bakıdan əvvəl Tbilisidə olan Y.Buzek Gürcüstanın Dağlıq Qarabağ münaqişəsinin həlli istiqamətində aparılan danışıqlarda tərəf kimi çıxış etmək cəhdlərini dəstəkləyib. AP prezidenti Gürcüstanda keçirdiyi mətbuat konfransında rəsmi Tbilisinin danışıqlarda iştirakının mümkünlüyünə işarə verib: "Gürcüstanın münaqişə tərəfləri ilə gözəl münasibətləri mövcuddur. Rəsmi Tbilisi Dağlıq Qarabağ münaqişəsinin həllində əsas oyunçulardan biri ola bilər".
Regionda mövcud olan "dondurulmuş münaqişələr"in həllində real addımlar atmağın tam vaxtının yetişdiyini bildirən AP prezidenti deyib ki, təmsil etdiyi qurum bu istiqamətdə bütün yardımları etməyə hazırdır.
Y.Buzekdən fərqli olaraq, Azərbaycan politoloqu Rüstəm Məmmədov bildirib ki, Gürcüstan Qarabağ münaqişəsinin həllinə girişsə, Cavaxetiya erməniləri hökuməti boykot edər. Politoloq bildirib ki, Gürcüstanın Dağlıq Qarabağ münaqişəsinin nizamlanması prosesinə təsir imkanları çox aşağıdır və o, belə bir təsirin qeyri-real və şübhəli olduğu fikrindədir: "Özü oxşar problem içində olan Gürcüstan Dağlıq Qarabağ münaqişəsinin nizamlanmasına necə kömək edə bilər ki?"
Azərbaycanlı politoloq hesab edir ki, bu bəyanat "Avropa Parlamenti rəhbərinin Tbilisiyə kompliment xarakterli nəzakət jestidir, bundan artıq bir şey deyil".
Rüstəm Məmmədov həmçinin bildirib: "Gürcüstan özü də analoji problemlərlə üzləşib. Onun Qarabağ münaqişəsinin nizamlanması prosesinə köməyi ağlabatan deyil. Gürcüstan Dağlıq Qarabağ münaqişəsinin nizamlanmasına həqiqətən qoşulmaq istəsə, bu münaqişənin ədalətli həllini tələb etməyə cəhd göstərsə, Cavaxetiya erməniləri ayağa qalxacaq və ölkə üçün yeni problem yaradacaq".
|
