Avropa Parlamenti Azərbaycanda insan haqlarının vəziyyətini tənqid edən qətnamə qəbul edib. "Azadlıq" radiosunun məlumatına görə, bu barədə təşkilatın yaydığı press-relizdə bildirilir. Mayın 12-də Strasburqda qəbul edilən sənəddə Avropa Parlamenti Azərbaycanda müxalifətin etiraz aksiyalarının dağıdılmasını pisləyir, vətəndaş cəmiyyətinin, sosial şəbəkələrin fəallarına və jurnalistlərə qarşı təzyiqlərdən "dərin narahatlıq" keçirdiyini ifadə edir. Sənəddə Cabbar Savalan və Bəxtiyar Hacıyevin hökumət əleyhinə etirazlara çağırdıqlarına görə narkotik və ordudan yayınma ittihamı ilə həbs olunduğu, ölkədə insan haqları sahəsində vəziyyətin pisləşdiyi tənqid olunur. Bundan başqa, hakimiyyət jurnalistlər və siyasi fəallara qarşı hədə-qorxu və təqibləri artırmaqda suçlanır. Avropa Parlamentinin deputatları Cabbar Savalan, Bəxtiyar Hacıyev və Eynulla Fətullayevi azad etməyə, qanunsuz ittihamlardan imtina etməyə və ölkədə jurnalistlərin müdafiəsinə təminat verməyə çağırırlar. Sənəddə mart və aprel aylarında müxalifətin etiraz aksiyaları zamanı 200-dən çox fəalının saxlanması da tənqid edilir. Tanınmış müxalifətçilərin və Avropa İnsan Haqları Məhkəməsinin qərarına baxmayaraq, hələ də həbsdə saxlanan jurnalistin dərhal azad edilməsi istənilir. Bundan başqa, Azərbaycanda jurnalistlərə və siyasi fəallara qarşı hədə-qorxu və təqiblərin artdığı da ayrıca qeyd edilir.
Avropaya İnteqrasiya Azərbaycan Milli Komitəsinin rəhbəri Rəşad Şirin bildirib ki, bu qətnamə ilə ölkədə media azadlığının vəziyyətinin yaxşılaşacağına o qədər inanmır: "Bu sənəd təzyiqlərə məruz qalan insanlara və jurnalistlərə mənəvi dəstək və hökumətə müəyyən qədər təzyiq ola bilər. Amma bilmirəm, o, uzunmüddətli dövrdə Azərbaycanda media azadlığının vəziyyətinə nə qədər təsir edə bilər". Azərbaycanda fəaliyyəti yasaq olunmuş İnsan Haqları Evinin rəhbəri Vüqar Qocayev isə bildirir ki, bu qətnamə olduqca həssas məqamda qəbul edilir. Ona görə də hökumətin addımlarına təsir edə bilər. Son bir neçə ayda Azərbaycanda müxalifətin siyasi islahatlar tələbi ilə keçirdiyi mitinqlərin dağıdılmasına görə Avropa Birliyi aprelin 7-də Azərbaycana tənqid bəyanatı göndərmişdi. Hələlik bu qətnaməyə Bakıdan hansısa bir reaksiya məlum deyil.
|
