Bir müddət öncə 35 illik yubileyini böyük təntənə ilə qeyd edən Nura Suriyə həmin gün özəl bir hədiyyə olmuşdu. Bəstəkar İsa Məlikov ona yeni bir mahnı hədiyyə etmişdi. Nura artıq bu bəstəni lentə yazdırıb.
Yeri gəlmişkən, mahnının aranjimanı da elə bəstəkarın özünə məxsusdur. Sözləri isə Kubra xanıma aiddir. Nəzərə alsaq ki, bir çox sənətçilərin mahnı boğçasında yeni mahnılar azlıq təşkil edir, onda Nura Surinin həmkarlarından fərqləndiyini söyləmək olar. Çünki bir ay öncə yeni albomunu pərəstişkarlarının ixtiyarına təqdim edən sənətçi artıq növbəti albom üzərində çalışmağa başlayıb. Yəni bəzilərindən fərqli olaraq sənətçi boş söz deməyib. Hətta yeni ilin ilk günlərində albomun təqdimatı belə nəzərdə tutulur.
Nuranın yeni albomunda eyni zamanda musiqisi anonim, sözləri Azər Şirinə, aranjimanı Osman Həmidova məxsus olan yeni bir bəstəni də eşitmək mümkün olacaq. Yeni topluda musiqisi Aynur Adilqızına, sözləri Sevinc Şirinovaya məxsus olan maraqlı bir mahnı da yer alacaq. Mahnının aranjimanı isə Samir Şirinova aiddir. İfaçının sayca 3-cü albomunda bəstəçi Gövhər Həsənzadənin daha bir bəstəsi yer alır. Bu barədə açıqlama verən Nura Suri fərqli bəstəçilərlə işləməkdən zövq aldığını da söylədi:
"Çünki müasir dinləyici yeniliyi sevir. Eynitipli mahnılar dinləyicini yora bilir. Ona görə də çalışıram ki, albomda fərqli janrlarda və fərqli üslublarda bəstələr olsun".
Yeri gəlmişkən, Nura bu albomunda yeni bir duetə imza atır. Bu dəfə Nurlan Növrəsli ilə duet oxumağa hazırlaşır. Boş vaxtlarını isə studiyada çalışır. Albomda Murad Arifin mahnılarından birinin yer alması da planlaşdırılır. Nuranın sözlərinə görə, artıq Murad Ariflə danışıqlar aparılır.
Çox güman ki, yayda Nura mahnılarından birinə klip də çəkdirsin. Rejissor işini yenidən Fuad Əlişova həvalə etmək fikrindədir.
|
