Meyxanaçı və ifaçı Namiq Qaraçuxurlu son zamanlar efirlərdə görünmədiyinin səbəblərini açıqladı. Söylədi ki, səbəb - yorğun olması imiş:
"Buna baxmayaraq, artıq yaradıcılıq işlərimin başındayam. Xeyli mahnılarım studiyada qalıb. İlk işim onları tamamlamaq olacaq. Yarımçıq şeirlər, yazılası sözlər var. Bu ərəfədə onlarla məşğul olacağam".
Meyxanaçı qarşıdakı işləri barədə təfsilatlı danışmağın tez olduğunu söylədi. Amma yol polisi haqqında oxuyacağını açıb dedi:
"Bir maraqlı işim də var. Bu, bizim yol polisləri haqqında olacaq. İnsanların keçidlərdən, sürücülərin qeyd olunan zolaqlardan keçərkən piyadalara güzəşt etməsi və qaydalara riayət etməsi haqqında tədqiqi və təbliği mövzumuz var. Hazırda Dövlət Yol Polisi ilə danışıqlar gedir. Əgər bu fikrimizə razılıq versələr, bu kiçik layihəni tezliklə gerçəkləşdirməyi düşünürəm".
Meyxanaçı sözügedən mahnıya əlavə olaraq dedi ki, mahnı hazır olandan sonra onun klipi də düşünülür: "Yollarda bizə şərait yaratmalıdırlar, bununla bağlı formalar və maşınlar lazım ola bilər".
Daha bir xəbəri sonda qəzetimizlə bölüşən meyxanaçı söylədi ki, ötən gecə səsyazma studiyalarının birində Aygün Kazımova ilə uzun fasilədən sonra növbəti duet mahnılarını yazdırıblar. Şəxsi münasibətlərində soyuqluq yaranandan sonra cütlüyün nə vaxt duet oxuyacağı bir çoxları üçün maraq kəsb edirdi. Meyxanaçı məhəbbət mövzusunda olan bu duetin sözlərini özü yazdığını, duet çoxdan gözlənilsə də, onların vaxt problemi səbəbindən gecikdiyini deyir...
"Amma çoxları elə düşünürdü ki, Aygün Kazımova ilə şəxsi həyatda yollarımız ayrıldı deyə, səhnədə də birləşmərik. Amma biz yaradıcılığı axsatmağı düşünmürük. Uzun fasilə yaranmışdı, artıq yeni duetlə əməkdaşlığımızı təzələdik. Studiya işləri bitəndən sonra mahnı kütləyə tanıdılacaq".
|
