Dünyanın 1 nömrəli terrorçusu kimi düşdü tarixə. Adı dünyanı sarsıdan bir çox terror hadisələrində hallandırılan, bir vaxtlar Sovet İttifaqına qarşı vuruşmuş "Əl-Qaidə" lideri Usamə bin Laden öldürüldü. Amerikanın başına milyonlarla pul qoyduğu bin Laden əslində kim idi? Adi bir adam.
11 sentyabr hadisəsi və kütləvi qırğınlarla müşayiət olunan teraktlarla "məşhurlaşmış" bu şəxs səudiyyəli varlı bir ailənin tək oğlu idi. Gənc yaşlarından "Müsəlman qardaşlar"ın təsirinə düşmüş bin Laden 1979-cu ilin dekabrında Pakistana yollanmış, orada Sovet İttifaqına qarşı mübarizə məqsədilə təlimlər keçmişdi. 1988-ci ildə könüllülər dəstəsindən ibarət "Əl-Qaidə"ni yaratdı. 1990-cı ildə İraqın keçmiş lideri Səddam Hüseyn Küveytə soxulduqdan sonra bin Laden Səudiyyə sərhədlərini qorumağın ona verilməsini istədi. Lakin kral Fəhd amerikalı əsgərləri çağırdıqda bin Laden ölkəni tərk edib əvvəl Pakistana, ardından Əfqanıstana, sonra isə Sudana getdi. ABŞ-a qarşı ilk cəbhəni Somalidə açan və 1994-cü ildə Səudiyyə vətəndaşlığından çıxarılan Usamə bin Laden uzun bir vaxt ərzində Talibanın himayəsində Əfqanıstanda yaşayıb.
Ən yaxın dostu özündən sonra "Əl-Qaidə"də ikinci şəxs olan Ayman-əl Zəvahiri idi. Bin Ladenlə yanaşı Zəvahiri də cihad çağırışları edirdi.
Usama bin Laden 11 sentyabr hadisələrini törədən şəxs kimi tarixə düşüb. Hadisədən sonra onun bu faciəni sevinclə qarşıladığı bir video yayılmışdı. Lakin videodakı şəxsin Laden olub-olmadığı hələ də şübhə altındadır.
11 sentyabr terrorundan sonra əgər öldürülərsə, özündən sonra "Əl-Qaidə"yə Xalid ibn Qasımın lider olmasını vəsiyyət etmişdi.
1998-ci ildən beynəlxalq miqyasda axtarılan, Amerikanın başına 25 milyon dollar pul qoyduğu Ladenin müsəlmanlar arasında çox sayda fanatı vardı. Baxmayaraq ki, nə qədər müsəlmanın ölümü onun vicdanında idi.
1 may 2011 tarixində isə Pakistanın Abbotabad şəhərində amerikalı komandoslar tərəfindən öldürüldü. Cəsədi dənizə buraxıldı. Onun məzarı olmayacaq. Beş qarış torpaq ona nəsib olmadı. Onu torpaq götürmədi də söyləmək olar.
Ladenin törətdiyi iddia edilən əsas teraktlar isə bunlardır:
1992-ci il, dekabr. Yəməndə bir oteldə amerikalı əsgərləri hədəf almış bombalama hadisəsi.
1993-cü il. Somalidə qərblilərə qarşı Aydidə dəstək olaraq Moqadişoda 18 amerikalının öldürülməsi.
1993-cü il, fevral. Nyu-Yorkda Dünya Ticarət Mərkəzinin bombalanması.
1995-ci il. Filippin adalarında papaya sui-qəsd cəhdi.
1995-ci il. Cəzirəli İslam qrupunun Fransaya qarşı savaşı.
1995-ci il, iyun. Misir dövlət başçısı Hüsnü Mübarəkə sui-qəsd cəhdi.
1995-ci il, noyabr. Ər-Riyadda 5 amerikalı əsgərin ölümü ilə nəticələnmiş bombalama hadisəsi.
1995-ci il, noyabr. Pakistanda Misir səfirliyinin bombalanması, 17 ölü.
1998-ci il, 7 avqust. Amerikalı əsgərlərin Müqəddəs torpaqlara gəlmələrinin 8-ci ildönümündə Keniya və Tanzaniyada ABŞ səfirlikləri partladıldı, ümumilikdə 257 insan öldü, 5500 insan isə yaralandı.
2001-ci il, 11 sentyabr. Əkiz qüllələrin dağıdılması.
Öldürüldüyü evdə onun yeni bir terakt hazırlığında olduğunu göstərən sənədlər tapılıb... Həyatı terror hadisələri ilə "bəzənmiş" Laden bu yolda da öldürüldü. Su səhəngi suda sınmalı idi.
|
