Rəqqasə Fatimə: \"İnanın, o məndən də gözəl oynaya bilər\"

Rəqqasə Fatimənin rəqsi atacağı barədə xəbərlər dolaşır. Bir neçə ay öncə şəxsi biznesini quran rəqqasənin biznes-ledi fəaliyyəti deyilənləri bir qədər doğrultsa da, bunun nə dərəcədə doğru olduğunu onun özündən xəbər aldıq. Fatimə bu barədə, eləcə də şəxsi həyatından danışdı:

- Hansı işlə məşğul olsam, rəqsi heç zaman ata bilmərəm. Bəlkə nə vaxtsa ara verdim, oynamadım. Amma bu bir müddətlik olacaq. Hərdən insan hər şeydən yorulur, bir az istirahat etmək istəyir. Buna bəziləri depressiya deyir, amma mən bəzən bezdiyimi deyirəm. Nə vaxtsa özümə istirahət verəcəyəm, şou-biznes mühitindən uzaqlaşacağam. Məndən heç kim inciməsin, amma yorulmuşam. Amma bu o demək deyil ki, mən özümü ulduz sayıram. Sıxılmışam söz-söhbətlərdən, şayiələrdən, qalmaqallardan. Hərdən özümə yazığım gəlir. İşə o qədər aludə olmuşam ki, nə uşağıma, nə anama, nə də özümə zaman ayıra bilmirəm.

- Qız uşağı böyüdürsən, özü də atasız, çətindir?

- Çox çətindir. Amma bu çətinliyə baxmayaraq, mən yaxşı yaşamağımız üçün əlimdən gələni edirəm. Həyatda tək deyiləm.

REKLAM

Dünyada milyonlarla qadın uşağını tək böyüdür. Allah özü bizim ruzimizi əsirgəmir.

- Şou-biznesdəki bəzi qadınlar barəsində xoşagəlməz fikirlər danışılır. Sizin şəxsi həyatınızdakı boşluq belə söhbətlərə yol açır?

- Bu aləmdəki xanımlar haqqında bu cür fikirlər yersizdir. Biz ictimaiyyətə tanışıq deyə, belə danışırlar. Əgər bir qadının var-dövləti, adı-sanı var, üstəlik Allah onu məşhur edibsə, o demək deyil ki, şayiə obyekti olmalıdır. Allahın köməyini ən çox onlar üçün diləyirəm.

- Əvvəllər yalnız milli rəqsləri oynayan Fatimə niyə sonradan ampluasını dəyişdi?

- Əslində, mən açıq geyinib, oriyental rəqslər oynamamışam. Düzdür, əvvəllər ancaq milli geyimlərdə, bu cür rəqslər edirdim. Bir müddət ailə durumum çox pis idi. Belə deyim, müflisləşmişdik. Vəziyyət çox gərgin idi. Mən ailəmi dolandırmaq üçün səhnədə daha çox oynamalı idim. Həmin ərəfədə evimizə qədər satıb, kirayədə qaldıq. Belə qərara gəldim ki, ampluamı dəyişim. Bir çox xalqların rəqslərini oynamaq qərarına gəldim. Əslində, bunun özündə pis heç nə yoxdur. Niyə də, başqa xalqların havasına oynamayaq. Elə o vaxtdan da hər bir musiqiyə rəqs etməyə başladım. Daha çox hind rəqslərini oynamağı sevirəm.

- Qızınız özünüz kimi sənət adamı olmağa meyillidir, yoxsa?

- Biz onunla tamam əks insanlarıq. Ərköyün qızdır. Amma buna baxmayaraq, biz onunla rəfiqəyik. Mən hər zaman çalışıram ki, Aydan məndən uzaqlaşmasın. Tək uşaqdır, çalışıram ki, eqoist böyüməsin. Mən çox şən, deyən-gülən insanam. Amma o, əksinədir. Karyera qurmaq, yaxşı məktəblərdə dərs almaq istəyir.