Parlament Jurnalistlər Birliyi Milli Məclisin işinin media tərəfindən daha yaxşı işıqlandırılmasına yönələn yeni layihənin icrasına başlayıb. "Parlament-cəmiyyət münasibətlərində medianın rolunun gücləndirilməsi" adlı layihə çərçivəsində təşkilat xeyli yeniliklərə imza atmağı planlaşdırır.
Artıq PJB-nin təşəbbüsü ilə "Modern.az" saytında parlamentin işinə həsr edilən xüsusi bölmə yaradılıb. Bu bölmədə Milli Məclisdə müzakirəyə çıxarılan, qəbul edilən sənədlər barəsində ətraflı məlumat verilir. Çox maraq doğuran, əhalinin həyat tərzinə birbaşa aidiyyəti olan qanun layihələri ilə bağlı ekspert rəyləri hazırlanaraq sayta yerləşdiriləcək. Bu cür sənədlərlə əlaqədar həmçinin komitə sədrləri və üzvlərindən müsahibələr hazırlanaraq sayta yerləşdiriləcək.
İlk dəfə olaraq PJB komitə sədrləri və deputatlarla həm də qısa videomüsahibələr hazırlayıb onları sayta yerləşdirəcək. Müzakirədə olan və yeni qəbul edilən qanunlar veb-səhifədə yer alacaq. Tanınmış hüquqşünasların qanunlarla bağlı izahatı, qanunun üstün cəhətləri və çatışmazlıqlarının göstərilməsi ilə müşayiət olunan yazılar da yerləşdiriləcək.
Artıq "Modern.az"da hansı sahəyə aid qanunların qəbuluna ehtiyac olmasına dair onlayn sorğu da elan edilib. İstifadəçilər istədikləri cavab variantını seçməklə Azərbaycanda hansı sferada qanunvericiliyin gücləndirilməsinə ehtiyac olduğunu bildirəcəklər. Oxşar sorğu deputatlar və jurnalistlər arasında da keçiriləcək.
Dörd aylıq layihə boyunca müzakirəsi davam edən, bütövlükdə cəmiyyət üçün xüsusi maraq kəsb edən qanun layihələrinin ictimai müzakirəsi təşkil ediləcək. Bu müzakirədə həmin qanun üzərində işləyən qrup üzvləri, komissiya sədrləri və komissiyanın üzvləri, müvafiq dövlət strukturunun nümayəndələrinin iştirakı təmin ediləcək. İlk dəfə olaraq tədbirin video çəkilişi aparılacaq və müzakirələr zamanı səslənmiş ən maraqlı və önəmli fikirlərin video variantı da sayta yerləşdiriləcək. Bu da qanun layihəsi ilə bağlı onlayn müzakirələrin açılmasına şərait yaradacaq.
Saytdakı materialların daha çox internet izləyicisinə yayılmasını təmin etmək üçün Facebook, Twitter kimi sosial şəbəkələrdən də istifadə olunacaq. Bir sözlə, saytda parlamentin işini onun içindən görmək mümkün olacaq.
|
