"Bakının yeniləşmiş görkəmi məni ürəkdən sevindirir. Biz Bakıya gələn kimi imkan tapıb həmkarlarımızla fikir mübadiləsi apardıq. Çünki mənim kimi, burada iştirak edənlərin əksəriyyəti son beş ildə Bakıda olmamışıq. Biz gördük ki, müxtəlif informasiya məlumatlarında, statistik nəşrlərdə deyilən tərəqqi göz önündədir".
Bu barədə Ukrayna prezidenti Viktor Yanukoviç Azərbaycan-Ukrayna sənədlərinin imzalanma mərasimindən sonra prezident İlham Əliyevlə birgə mətbuat konfransında deyib. Ukraynalı yüksək qonaq qeyd edib ki, "Azərbaycan iqtisadiyyatı ilbəil çox yüksək sürətlə inkişaf edir. Bizim üçün bu, hər hansı kəskin daxili və xarici siyasi dəyişiklikləri qəbul etməyən dövlət idarəçiliyi sisteminin necə səmərəli işləyə bilməsini göstərən əyani nümunədir. Yəni sabitlik dövlətin inkişafının əsasıdır".
Viktor Yanukoviç deyib ki, ölkələrimiz arasında münasibətlərin əsasını təşkil edən ənənələr davam edir. Prezidentin sözlərinə görə, ötənilki əmtəə dövriyyəsi Azərbaycanın və Ukraynanın müstəqillik qazandığı bütün illər içərisində görünməmiş səviyyədir:
"Bu il Ukrayna da, Azərbaycan da müstəqilliklərinin 20-ci ildönümünü qeyd edəcəkdir. Biz ötən il parlaq nümunə göstərdik, əmtəə dövriyyəsi elə səviyyəyə qalxdı ki, Ukrayna hazırda Azərbaycanla bu göstərici üzrə ikinci yeri tutur. Bu, bizim üçün xoşdur. Əlbəttə, razılaşmalarımızı yerinə yetirməyimiz, onlara əməl etməyimiz çox vacibdir".
Haqqında bu qədər danışılan Odessa-Brodı neft kəmərinin isə Ukrayna üzərindən Baltik dənizinə qədər uzadılması vacib hesab edilir. Hər iki prezident bu məsələni müzakirə ediblər və ideya üzərində iş aparılacaq.
Yanukoviç vurğulayıb ki, razılaşdırılan müştərək sərmayə layihələri əlli-əlliyə gerçəkləşdiriləcək. İnşa ediləcək obyektlər, hansı ərazidə tikilməsindən asılı olmayaraq, Azərbaycan və Ukraynanın birgə mülkiyyəti olacaq. Ukrayna prezidenti bunu "etimadın ən yüksək səviyyəsi" adlandırıb. Yanukoviç Çernobıl AES-də "Örtük" layihəsinin həyata keçirilməsi üçün Çernobıl Fonduna Azərbaycanın 1 milyon dollar köçürməsi barədə qərarına görə İlham Əliyevə təşəkkürünü bildirib.
|
