Xalq artisti Aygün Kazımova onun adını daşıyan "Ay və Gün" dərgisini mətbuata təqdim edərkən bildirib ki, belə bir dərgi - fanatların ideyası olub, ideyanı bəyənməklə onlara mənəvi dəstək göstərəcəyini bildirib. Beləliklə, "Ay və Gün" işıq üzü görüb. Jurnalın şef redaktoru Nəzakət Əliyeva, art redaktoru Mədinə Gülgün seçilib. Müğənni dərgini qalmaqallardan uzaq tutacağını deyib:
"Röyanın dərgisi buraxılandan bir az sonra adı hansı qalmaqalda hallandı. Zərbə alan yazıq Röya oldu. Belə situasiyalarla qarşılaşmaq istəmirəm".
Müğənnidən münasibəti soyuq olduğu sənətçilərə "Ay və Gün"də yer ayrılacağını soruşanda, yarızarafatla, "gələn dəfə Natəvandan müsahibə götürərlər, ya da üz qabığına çəkilər" kimi fikir söylədi.
Aygün yaxın vaxtlarda təqdimatına hazırlaşdığı layihəsindən danışdı. Dedi ki, ictimaiyyətə bəlli olmayan peşəsini nümayiş etdirəcək:
"Bu təqdimatda hamını əməlli-başlı təəccübləndirəcəm. Hazırda müqaviləni imzalama ərəfəsindəyəm deyə, təfərrüatını aça bilmərəm. Yalnız onu deyirəm ki, burada xanımlar iştirak edəcək, hətta bəzi kişiləri də cəlb edə bilərik. Bütövlükdə isə kişilər iştirakçı xanımlara qiymət verəcəklər".
Müğənninin vizaş işini peşəkar səviyyədə bacardığını nəzərə alıb, onun bu istiqamətdə məharətini göstərəcəyini soruşduqda, "təxminən yaxınlaşmısınız, amma bu bir qədər də maraqlı bir iş olacaq" deyə bildirdi. Söylədi ki, bunun üçün onun ayrıca məkanı da olacaq. Əgər ictimaiyyət onun bu layihəsinə böyük maraq göstərərsə, müğənni bunu uzun müddətə davam etdirəcək.
Son həftələr arıqlamaq üçün müxtəlif metodlar seçən Aygün Kazımovanın bədən forması da diqqətdən yayınmırdı. 90-cı illərin Aygün Kazımovasını xatırladan sənətçi saçlarının da boyasını dəyişərək, qara rəng seçib. Müğənni deyir ki, kilosu normal hesab edilsə də, efirdə hələlik bir qədər dolu görünür. Ona görə də hələ bir neçə kilodan azad olmaq istəyir.
Yeri gəlmişkən qeyd edək ki, xalq artisti Aygün Kazımovanın qızı İlqarə İbrahimovanın qalmaqallı videosu ilə bağlı məsələ hüquq-mühafizə orqanları tərəfindən araşdırılır. Bu barədə danışan sənətçi belə deyib:
"Mən və qızım millətin qarşısında onlara şans verdik. Onlar isə hətta insani addım atmaqdan da çəkindilər. Mən dedim, əgər belədirsə, məsələ qanunla həllini tapsın, artıq proses başlayıb. Hazırda proses davam edir".
Sənətçi bildirib ki, bundan sonra qarşı tərəf üzr istəsə belə, bunu qəbul etməyəcəklər: "Artıq söhbət bitdi. Bundan sonra üzr istəməklə bu söhbət keçməyəcək. Üzr istəmək şansı verdik onlara. O yaşda uşağımda cəsarətə bax ki, belə bir vəziyyətdə efirə çıxdı. Amma o kişilərdə cəsarət olmadı. Ona görə də bundan sonra məsələ hüquqi müstəvidə həll olunacaq".
|
