Bu ilin dövlət büdcəsinin xərclər hissəsi təqribən 1 mlrd. manata qədər artırılacaq. Xəbər verdiyimiz kimi, maaş və pensiyaların artımı planlaşdırılır. Artım əməkhaqları dövlət büdcəsindən maliyyələşən və orta aylıq əməkhaqqı aşağı olan sahələri əhatə edəcək.
Ekspertlər artımların qiymətlərə təsirsiz ötüşməyəcəyini söyləyirlər. Odur ki, əməkhaqqı artımlarının istehlak bazarına təsirlərini azaltmaq və eləcə də yeni qiymət artımları üçün baza yaratmasının qarşısının alınması üçün kompleks tədbirləri vacib sayırlar. Çünki dövriyyədə pul kütləsinin artması nəticə etibarı ilə qiymətlərin qalxması və 2011-ci ilin ikinci yarımilində daha yüksək inflyasiyanın yaranmasına yol açacaq. İqtisadçılar əməkhaqlarının mərhələli artımını təklif edirlər. Əks halda artırılan məvacib inflyasiyanın yeminə çevriləcək.
İqtisadçı Nazim Məmmədovun sözlərinə görə, Azərbaycanın artan iqtisadi imkanları insanların həyat səviyyəsində özünü göstərməlidir:
"Biz nə qədər ümumi daxili məhsulun artımından danışsaq da, ümumi iqtisadi göstəricilərin silsilə şəklində artmasını desək də, vətəndaşlar onları öz həyatında hiss etməsələr, bu, söz olaraq qalacaq. Hər il büdcə təşkilatlarında əməkhaqqı artırılır. Ancaq yenə də ölkədə kifayət qədər bahalığın olması fonunda bu artımlar çox cüzi görünür".
Yeri gəlmişkən, əməkhaqlarının neçə faiz artırılacağı ən çox maraq edilən məsələdir. Ekspert deyir ki, pensiyanın baza hissəsinin artırılması da məqsədəuyğundur. O, Nazirlər Kabinetinin bu yaxınlarda müəllimlərin dərs saatlarının maksimum həddini müəyyənləşdirən qərarını xatırladaraq əlavə etdi ki, bu islahatların aparılması normaldır:
"Müəllimlərin çox dərs yükünə meyil göstərməsinin səbəbi məhz əməkhaqlarının az olması, həm də müəllim çatışmazlığı ilə əlaqədardır. Ona görə müəllimlərin də, həkimlərin də əməkhaqları ilk növbədə artırılmalıdır. Güman edirəm ki, bu dəfə 20-25 faizə qədər artımın şahidi olacağıq".
|
