"Bu gün Azərbaycan mədəniyyətinə baxanda ürəyimdən ağrı keçir. Biz Şövkət Ələkbərovanın, Rəşid Behbudovun adını çəkəndə cavanlar əsəbiləşir. Yaxşı, onlar qaldı dünəndə, bəs bu gün? Dünən gənc olan Aygün Kazımova, Faiq Ağayev bu gün ortayaşlı musiqiçilər sırasındadır. İndi "azəri-starlar", "yeni ulduzlar", "akademiyalar", "muğamstarlar" həddən artıq çoxdur. Bəs onlar sabah bizə nə verəcəklər? Azərbaycan mədəniyyətinin bu gününü yeni doğulan uşağa bənzədirəm. Bəlkə də sabah mən həyatda olmayanda bunların hansısa addımı, uğuru olacaq, amma bu gün hələ ki heç nə etmirlər. Bu gün Azərbaycanda estrada musiqisi və ifaçılığı ağır vəziyyətdədir. İndi şou-biznes var. Şou-biznes isə bazardır, prodüserlər, aparıcılar, şoumenlər, yaxud da musiqidən başı çıxmayanların toplaşdığı bazar...". Bu sözləri Azərbaycan Bəstəkarlar İttifaqının katibi, əməkdar incəsənət xadimi Eldar Mansurov deyir. Bu acınacaqlı vəziyyəti professional bəstəkarlıq məktəbinə də şamil etdiyini vurğulayır:

"Mən Qara Qarayev, Fikrət Əmirov, Soltan Hacıbəyovu görmüşdüm. Bugünkü cavanlar isə onları görməyiblər. İndikilər kimi görürlər? Heç kimi, heç nəyi. İndi yerindən duran mahnı yazır, özünü bəstəkar hesab edir. Hər adam mahnı yaza bilər, amma öz səviyyəsində. Əlibaba Məmmədov, Ələkbər Tağıyev, Bəhram Nəsibov da həvəskar bəstəkar olublar. Çox gözəl mahnılar da yazıblar. Bəstəkarsansa, onda fortepiano üçün bir prelüdiya yaz, skripka üçün nəsə yaz, sonata, kvartet, hələ simfoniyadan danışmıram. Bəstəkarlıq budur. İndi hər divara mala çəkən durub desin ki, arxitektordur?"

Bəstəkar bu gün ifa olunan mahnıların tez unudulması məsələsinə də toxunur:

"Tofiq Quliyev, Cahangir Cahangirov, Rauf Hacıyev, Fikrət Əmirov ölməz mahnılar yaradıblar. Mən onların adının yanında çəkinə-çəkinə deyirəm ki, bəstəkaram. İndi kimdəsə səhv tutanda deyir ki, sən kimsən? Bunun səbəbi odur ki, bugünkü mahnılar sponsorun 5 min dolları ilə 5 dəfə efirdə gedir, pul qurtarandan sonra mahnı yaddan çıxır. Yaxşı musiqi isə yaddan çıxmamalıdır"...