Məleykə Əsədova onun sənətinə paxıllıq və qısqanclıq kimi mürəkkəb münasibətlərdən söz açıb. Bunu müəyyən mənada təbii sayan aktrisanın sözlərinə görə, onun sənətini qısqananlar az deyil, amma çalışır ki, buna fikir verməsin. Belələrini "bəsit insanlar" adlandırır və onlara məhəl qoymadığını deyir:
"Təəccüblənəsi bir şey də yoxdur. Əgər bu gün mən varamsa, səhnəyə lazımamsa, səhnədəki çıxışım zamanı hər kəs məni alqışlayırsa, qısqanclıqları da normal qəbul etməyə çalışıram. Çünki qısqanc, paxıl insan mənim üçün rəqib ola bilməz. İnsan rəqabətə girməli, paxıllıq etməməlidir. Onda karyera qazana bilməz".
Aktrisa əlavə edir ki, hər bir səhnə adamı istedadlı doğulmur. Onun fikrincə, illərdir səhnədə külüng vuranlar var, amma dəst-xətti yoxdur, tanına bilmir:
"Fikrimcə, istedadlı aktyor səhnəyə 2-3 və 5 ildən bir gələ bilir. Belə insanların qədrini bilmək lazımdır. Onun haqqında xoşagəlməz söhbətlər yarananda, bu nə vaxtsa onun qəlbini titrədir, narahat edir. Vaxtilə mən də eyni hissləri yaşayırdım. Amma sonradan özümü toparlayıb, heç nəyə fikir verməmək qərarına gəldim. Çünki bunları dərindən düşündükcə, həyatımın bir hissəsinə çevirirdim. Bu da səhnə fəaliyyətimə təsir edirdi".
Öz istedadına 100 yox, lap 150 faiz inandığını dilə gətirən xalq artisti xatırlatdı ki, vaxtilə onun sənətini Barat Şəkinskaya, Leyla Bədirbəyli, Həsən Turabov kimi səhnə ustaları qiymətləndiriblər.
|
