Nura Suri çoxdan vəd etdiyi albomuna və yenilənmiş saytına təqdimat mərasimi keçirib. Toplantıda sənətçi yazdırdığı bəzi mahnıların konkret ithaf nöqtəsi olduğunu deyib. "Nəğmələrimdə yaşadacağam" adı ilə təqdim olunan topluda "Dön artıq" mahnısı Milli Qəhrəmanımız Mübariz İbrahimova ithaf olunub. "Səndən öyrəndim"i müğənni anasına, Tarkanın repertuarından olan "Sevdanın son vuruşu"nu sonbeşiyi Davidə, "Annenin səsi"ni isə kimsəsiz uşaqlara həsr edilmişdir.
Sayt fərqli biçimdə hazırlanıb. Belə ki, adət etdiyimiz bioqrafiya, foto, mahnı bölümü ilə yanaşı Nura Suri sənətinə hörmət etdiyi bir sıra ziyalılarla götürdüyü müsahibəsini yerləşdirib. Müğənni bunu uşaqlıq hobbisi adlandırıb.
Amma mətbuat konfransı qalmaqalsız ötüşməyib. Belə ki, müğənni çıxış sözünə başlayan kimi jurnalistlərin etirazı ilə qarşılaşdı. Məsələ burasındadır ki, Nura bu gün təqdim etdiyi "Nəğmələrimdə yaşadacağam" albomunu artıq bir gün əvvəl paytaxtın əyləncə mərkəzlərinin birində, müğənninin həmkarlarının iştirakı ilə digər KİV mənsublarına təqdim edib. Həmin tədbirdə yazılı mətbuat iştirak etməsə də, telekanallara bütün yeniliklər barədə ətraflı danışıb.
Etirazın səbəbini anlamadığını deyən Nura öz arqumentlərini açıqladı: "Mən özümə söz vermişəm, həmkarlarımla birgə keçirəcəyim tədbirlərə artıq jurnalistləri çağırmayacağam. Çünki onlar gəlib mənim həmkarlarımdan müsahibə alırlar, mənim tədbirlərimdən isə sadəcə onlara verilən press-relizlərlə kifayətlənirlər. Bir məqam da var ki, jurnalistlər, xüsusilə də televiziya əməkdaşları həmkarlarımın mənim barəmdə danışdıqları yaxşı sözləri efirə vermir, yazmırlar. Bu, mənə qarşı hörmətsizlikdir. Niyə mənə qarşı bu münasibət var, bilmirəm", - deyə müğənni gileyləndi. Nura yenidən aparıcı kimi fəaliyyət göstərəcəyini də dedi: "ANS telekanalında qadınlara həsr olunan verilişin aparıcısı olacağam".
Müğənni konsert verməyəcəyini də açıqladı: "Azərbaycanda konsertdən pul qazanan müğənni yoxdur. Mənim 3 övladım var. Mən anayam. Bütün yük mənim üzərimdədir. Konsert keçirmək üçün kifayət qədər məbləğ lazımdır. Mən bu yay sadəcə klublarda çıxış edəcəyəm".
Sənətçi bu yaxınlarda reper Elşad Xose və müğənni Samir Cavadzadə ilə duet oxumağı planlaşdırır. Bununla yanaşı Nura bəstəkar-aparıcı Murad Arifdən də mahnı alıb.
|
