İbrahim Tatlısəsin silahlı hücuma məruz qalması bir çox planları da alt-üst edib. Türk mətbuatının yaydığı xəbərə görə, "Parmida Turizm" şirkətinin təşkilatçılığı ilə 4 konsert üçün Türkiyəyə gələn 6 min iranlı turist İbrahim Tatlısəs əvəzinə iranlı sənətçilər - Araş, Kamran, Human və Ebini dinləyiblər. "Parmida Turizm" Novruz həftəsində Antalyada İrandan gələn turistlərə konsert verməsi üçün İbrahim Tatlısəslə bizim pulla 450 min manat müqabilində razılaşıb. Konsertlərin ikisi Antalyanın Bələk (22 və 28 mart), digər ikisi Kəmər (23 və 29 mart) rayonlarında olmalı idi. Amma qəfil hadisə baş verdiyi üçün səhnəyə çıxa bilməyib. Nəticədə şirkətin planları alt-üst olub.
Bundan sonra şirkət sənətçilər Sibel Can və Ebru Gündeşə müraciət edib. Hər iki sənətçi başqa proqramları olduğundan təklifdən imtina ediblər. Sonda şirkət İran əsilli sənətçilər Araş, Kamran, Human və Ebi ilə razılaşıb.
Novruz bayramında Türkiyəyə gələn təxminən 6 min iranlı turist iranlı sənətçilərin səhnəyə çıxdığı konsertlərdə gecə saatlarınadək əyləniblər.
|
