Otuz bir il öncə Azərbaycanın büdcəsinin gəlirinin 40-45 faizini üzümçülük təşkil edirdi. İndi isə bu rəqəm heç 1 faiz belə deyil. Amma üzümçülük gəlirli sahə olduğundan onu inkişaf etdirmək həm istehsalçıların, həm də dövlətin marağındadır. Buna kifayət qədər potensial da var. Bir vaxt Azərbaycanda 35-ə yaxın üzüm emalı müəssisəsi olsa da, indi onların əksəriyyəti ya ləğv olunub, ya da işləmir. Yaxud da yeni texnologiyaların tətbiqinə ehtiyac var. Mütəxəssislər hesab edir ki, əgər bütün bunlar kompleks şəkildə həllini tapsa, yaxın 2-3 ildə üzümçülük və şərabçılıq sahəsində yüksəlişə şahid olarıq.
Hökumət üzümçülük üzrə xüsusi proqram hazırlamağı və fond yaratmağı planlaşdırır. Bu fond 10 il müddətinə kreditlər verilməsini nəzərdə tutur.
Yaxın bir neçə ildə Bakı kəndlərində 100 hektar ərazidə üzüm bağı salınacaq. Bununla bağlı sahibkarlarla müzakirələr aparılır. İİN Sahibkarlığa Kömək Milli Fondunun icraçı direktoru Şirzad Abdullayevin bildirdiyinə görə, hazırda bölgələrdə üzümçülüyün inkişafı sahəsində bir sıra layihələr həyata keçirilir və gələcəkdə bu işlər davam etdiriləcək. "Bu işlər çərçivəsində Qusar rayonunda müxtəlif üzüm sortları daxil olmaqla, 50 hektar üzüm bağı salınacaq", - fond rəhbəri qeyd edib.
KTN-dən verilən bilgiyə görə, üzümçülüyü dirçəltməyə tingçilik və iri təsərrüfatlar yaratmaqla başlamaq lazımdır. Nazirliyin Üzümçülük və Şərabçılıq İnstitutunun direktoru Tariyel Pənahovun sözlərinə görə, hazırda ölkəyə tinglər əsasən xaricdən - Fransa, İtaliya və Rusiyadan gətirilir. KTN mütəxəssisləri Fransa və İtaliya şirkətləri ilə Azərbaycanda müştərək ting müəssisəsi açmaq barədə razılığa gəlib.
|
