Bu addım istehsalı artırmaq üçün atılıb. Belə ki, 2015-ci ilə qədər ət istehsalının 340 min ton, süd 2,4 milyon ton, yumurta 1,3 milyard ədəd, taxıl 2 milyon 800 min ton, sənaye üsulu ilə quş əti istehsalını isə 80 min tona çatdırmaq nəzərdə tutulub. Bu hədəflərə çatmaq üçün Nazirlər Kabinetinin qərarı ilə ölkəyə gətirilən kənd təsərrüfatı avadanlıqlarının böyük hissəsi gömrük rüsumu və əlavə dəyər vergisindən azad olunub. Beləliklə, bu vacib avadanlıqlar iş adamlarına xeyli ucuz başa gələcək.
KTN şöbə müdiri Rafiq Məcidovun bildirdiyinə görə, Nazirlər Kabinetinin qərarı bu məqsədə çatmağa hesablanıb:"Ölkəyə quşçuluğun inkişafı üçün avadanlıqların idxalı nəzərdə tutulur. Bunlar aqrolizinq vasitəsilə gətiriləndə ƏDV-dən azad olunurdu. Lakin indi hər kəs bu avadanlıqlara görə ƏDV və gömrük rüsumundan azad olunacaq".
Şöbə müdiri onu da bildirdi ki, hazırda Azərbaycan özünü bir sıra məhsullarla tam təmin etsə də, bəzi sahələrin inkişafına ehtiyac var. Ölkə ötən il öz ehtiyacını ödəməklə yanaşı, 188 min ton meyvə, 62 min ton kartof da ixrac edib. Yeni güzəştlər isə iş adamlarına əlavə imkanlar yaradır. 15 faiz gömrük rüsumu və 18 faiz ƏDV-nin ləğvi ilə sahibkar 33 faiz rüsumdan azad edilmiş olur. Bu isə kənd təsərrüfatı sahəsi üçün böyük güzəşt sayılır.
Tətbiq olunan güzəşt hər bir hüquqi və fiziki şəxsə sərbəst şəkildə ölkəyə kənd təsərrüfatı malları və avadanlığı gətirməyə imkan verəcək.
|
