Bakıda yeni beynəlxalq hava limanının tikintisinə başlanıb. Tikintiyə başlanma mərasimi prezident İlham Əliyevin iştirakı ilə keçirilib. Hava limanı 1960-cı ilin ortalarında tikilmiş və yenidən qurulmadan sonra daxili reyslər üçün istifadə olunan köhnə aeroportun yerində inşa ediləcək.
Məlumatlı qaynaqlardan "Turan"a bəlli olub ki, yeni hava limanının gücü ildə 3 mln. sərnişin təşkil edəcək ki, bu da indiki sərnişin axınından 2 dəfə çoxdur. 2000-ci ilin əvvəllərində tikilmiş hazırkı beynəlxalq aeroport da yenidən qurulacaq və daxili reyslər üçün istifadə olunacaq.
Yeni hava limanı beynəlxalq standartlara uyğun inşa ediləcək. Onun uçuş-enmə zolağı 4 km olacaq və yeni nəsil "Boinq", "Ruslan" tipli yük təyyarələrini qəbul etməyə qadir olacaq. Bundan başqa, hava limanı ən aşağı hündürlükdə uçan təyyarələri müəyyən etmək qabiliyyətinə malik radarlarla təchiz olunacaq.
Tikinti 27 ay müddətində aparılacaq. İşlərin baş podratçısı yerli DİA-holding şirkətidir. Layihənin dəyəri 400 mln. dollar təşkil edir. Son illər Naxçıvan, Gəncə, Zaqatala və Lənkəranda beynəlxalq aeroportlar tikilib. Lakin bu hava limanlarına qoyulan on milyonlarla dollar vəsaitin özünü doğrultmadığı barədə fikirlər var.
|
