Ərəb ölkələri çalxanır. Yəmənin paytaxtı Sana şəhərində etirazçıların cümə namazından sonra toplaşdıqları meydandan kənara yayılmalarına əngəl olan polislər onlara atəş açıb. Xəstəxana qaynaqları 30 nəfərin öldüyünü, 100-dən çox adamın yaralandığını bildiriblər. Həkimlər ölü və yaralıların artacağından əndişə edirlər, - deyə Anadolu agentliyi xəbər verir.
Yəməndə 32 ildir hakimiyyətdə olan Əli Abdulla Salehin hakimiyyətdən getməsini istəyənlərin nümayişləri bir aydan artıqdır davam edir. Polis onlara qarşı gerçək və plastik güllələrdən, zopalardan, gözyaşardıcı qazdan, bıçaqlar və daşlardan istifadə etməsinə rəğmən, adamlar inadla etirazlarını sürdürəcəklərini bildirirlər.
Tunisdə hakimiyyət dəyişikliyindən sonra sakitlik çöksə də, Misirdə gərginlik hələ də qalır. Qahirədə Təhrir meydanına toplaşanlar və əsgərlər arasında toqquşmalar baş verir. Qarşıda konstitusiya dəyişikliyi ilə bağlı referendum keçiriləcəyindən bəzi yasaqlar qüvvəyə minib. Lakin bəzi müxalifət qrupları ehtimali konstitusiya dəyişikliyinə qarşı çıxırlar. Cəmiyyətdəki gərginlik bundan qaynaqlanır.
Bəhreynə gəldikdə, bu ada dövlətinə Səudiyyə Ərəbistanı qoşunları yeridilmiş və etirazçılar qovulub dağıdılmışdır. Etirazların sünni-şiə müstəvisinə keçməsi - şiələr sünni azlığın hakimiyyətini qəbul etmir - İslam Konfransı Təşkilatı tərəfindən narahatlıqla qarşılanıb və məsələnin bu şəkildə qoyuluşu doğru sayılmır.
Səudiyyə kralı, 86 yaşlı Abdulla ben Əbdüləziz isə ilk dəfə millətə birbaşa telemüraciətlə çıxış edərək, ərəb ölkələrindəki iğtişaşların fonunda öz təbəələrinə loyallıq nümayiş etdirdiklərinə görə təşəkkürünü bildirmişdir. Kral vəd edib ki, əlavə 80 min iş yeri yaradacaq, sosial təminatın səviyyəsini isə artıracaq.
|
