AMAY-la bağlı firmaların məhkəmə prosesi başlayır

AMAY şirkətlər qrupu ilə bağlı firmaların fəaliyyətinə görə həbs edilən şəxslərin martın 18-də növbəti məhkəmə prosesi başlayır. Bu xəbər "Turan"a məlumatlı mənbədən daxil olub.

Bildirilir ki, bu firma sahibləri müxtəlif banklara girov qoyduqları daşınmaz əmlak müqabilində maliyyə vəsaitləri götürüblər. Amma maliyyə vəsaitlərinin qaytarılmasında problemlər yaranıb. Mənbə bildirib ki, banklar maliyyə vəsaiti qaytarılmadığına görə qoyulan daşınmaz əmlakları götürmək əvəzinə firma sahiblərinə cinayət işi qaldırılması üçün ölkə prokurorluğuna müraciət ediblər. "Bu bir iqtisadi məsələdir, burada cinayət tərkibi yoxdur, istənilən halda bank qoyulan daşınmaz əmlakı maliyyə vəsaiti əvəzinə götürə bilərdi", - deyə mənbə nəzərə çatdırıb. Eyni zamanda, ölkə prokurorluğunun buna cinayət işi kimi yanaşmasını mənbə doğru saymayıb.

Son olaraq mənbə ölkə KİV-lərini gerçək həqiqəti bilmələri üçün martın 18-də Ağır Cinayətlərə Dair İşlər üzrə Məhkəmədə başlanacaq növbəti məhkəmə prosesində iştiraka dəvət edib.