Tovuz rayon mərkəzindən 12 km aralıda yerləşən və Ermənistanla 5 km-lik sərhədi olan Vahidli kəndi 1150 sakinin yaşadığı 325 ev təsərrüfatından ibarətdir. Ümumi otlaq sahəsi olan kənd təmas xəttində yerləşdiyi üçün burada torpaq islahatı aparılmayıb. Əsasən maldarlıq və qismən əkinçiliklə məşğul olan kənd əhalisinin 16 faizi (başqa sözlə, 52 ailə) ünvanlı dövlət sosial yardımı alır ki, bu da həmin kənddə yoxsulluq səviyyəsinin digər yerlərlə müqayisədə daha yüksək olduğunu göstərir.
Odur ki, "Özünədəstək" - ünvanlı sosial yardım layihəsi ilə bağlı sınaq işlərinə bu sərhəd kəndində start verilib. Dövlətin ümumən sərhəd kəndlərinə qayğısının təsirli formada artırılacağı bildirilir. İlk olaraq Vahidli kəndi seçilib. ƏƏSMN ictimaiyyətlə əlaqələr sektorundan bildirilir ki, layihə aztəminatlı ailələrin yoxsulluq vəziyyətindən çıxarılmasına aktiv tədbirlər vasitəsilə və onların mövcud daxili resurslarından istifadə olunmaqla kömək göstərilməsi məqsədilə hazırlanıb. Vahidli kəndində yerli şərait və kənd əhalisinin təcrübəsi nəzərə alınmaqla burada maldarlığın inkişaf etdirilməsi nəzərdə tutulur.
Bu məqsədlə nazirliyin Yoxsulluq problemləri və ünvanlı yardım siyasəti şöbəsinin müdiri Natiq Qasımov bu kəndin əhalisi ilə görüşüb, yeni layihənin mahiyyət və məqsədləri barədə məlumat verib. Həmin 52 ailədən 15 ailəni "Özünədəstək" layihəsinə cəlb etmək qərara alınıb. Ailələrin ünvanlı yardım almaq hüququnun olması, tərkibində uşaqlar və həmçinin əmək qabiliyyətli üzvünün olması, mal-qara saxlamaq üçün tövləsinin, yaxud əkib-becərmək üçün torpaq sahəsinin olması və s. vacib şərtlərdəndir. Eyni zamanda, onlar veriləcək vəsaitlə ailə təsərrüfatlarında hansı işlərin görüləcəyi ilə bağlı ailə planı təqdim etməlidir.
Belə ailələrin seçilməsində şəffaflıq və ədalətin təminatı üçün həmin ailələr kənd icra və bələdiyyə nümayəndələrindən, yerli ağsaqqallardan, seçiləcək fəaliyyət növü üzrə mütəxəssislərdən ibarət şura tərəfindən müəyyən ediləcək. Cari il ərzində başqa rayonlarda da bu kimi pilot layihələrin aparılacağı xəbər verilir.
|
