Nigar Əhmədbəyova Daxili İşlər Nazirliyini onun əmək hüquqlarını pozmaqda ittiham edir. Artıq mediaya və ictimaiyyətə tanış olan bu ittihamları növbəti dəfə Media Mərkəzində Silahlı Qüvvələrə Demokratik Vətəndaş Nəzarəti Mərkəzinin direktoru Ələkbər Məmmədov keçmiş polis kapitanı Nigar Əhmədbəyovanın və həyat yoldaşı Emin Əhmədbəyovun hüquqlarının pozulması ilə əlaqədar mətbuat konfransında bir daha səsləndirdi.
Nigar Əhmədbəyova bildirib ki, ötən ilin dekabrında əmək hüquqlarının pozulması ilə bağlı Daxili İşlər Nazirliyinin Baş Kadrlar İdarəsini məhkəməyə verib. O, 3 illik analıq məzuniyyəti başa çatana yaxın uşağının xroniki xəstəliyi ilə əlaqədar məzuniyyət müddətinin 1 il də uzadılmasını istəməsinə cavab olaraq işdən azad edilməsini qanunsuz sayır və işə bərpa olunmasını tələb edir.
Məhkəmə isə bu mülki iş üzrə icraatın dayandırılması və təkrar məhkəmə-tibbi ekspertizanın keçirilməsi barədə qərardad çıxarıb. Digər instansiyalar isə bu qərardadı qüvvədə saxlayıblar.
Nigar Əhmədbəyova bunu ərinin həbsi ilə əlaqədar ailəsinə qarşı təqib sayır.
Öz növbəsində iddiaçının səlahiyyətli nümayəndəsi, hüquq müdafiəçisi Ələkbər Məmmədov bildirir ki, Əmək Məcəlləsinə, müxtəlif konvensiyalara istinadən DİN Kadrlar İdarəsinin Nigar Əhmədbəyova barəsində işdən azadetmə barədə əmri vətəndaşın əmək hüququnun birbaşa pozulmasıdır.
Bundan əlavə, Məmmədov Əhmədbəyovanın həyat yoldaşının şərlənərək həbs olunması barədə danışıb. Onun sözlərinə görə, Əhmədbəyov yol polisinə müqavimət göstərməkdə ittiham olunaraq 2010-cu ilin yanvarında 3 il müddətinə azadlıqdan məhrum edilib... Hazırda onun həbs rejimi dəyişdirilərək 3/1 ilə komendaturaya göndərilib. Eyni zamanda Əhmədbəyov müalicə alır.
Məmmədov onu da bildirir ki, Əhmədbəyovların pozulmuş hüquqlarının bərpası ilə bağlı iki iş artıq Avropa Məhkəməsinə göndərilmişdir.
|
