Silahlı Qüvvələrə Demokratik Vətəndaş Nəzarəti Mərkəzinin direktoru Ələkbər Məmmədov martın 2-də Media Mərkəzində mətbuat konfransı keçirərək Böyük Vətən müharibəsi veteranı Leonid Adurovun hüquqlarının pozulduğunu ictimaiyyətə çatdırdı.
Ələkbər Məmmədovun sözlərinə görə, daxili işlər nazirinin müavini Əsgər Ələkbərov Bakının Xətai rayonu, Kamandar Əhmədov küçəsi, ev 1, mənzil 4-də yaşayan Leonid Adurovun mənzilindən çıxarılması barədə bildiriş imzalayıb. Bu il aprelin 1-dək mənzil boşaldılmalıdır. Bu qərar daha 11 ailəyə aiddir. Onlar arasında DİN veteranları və əməkdaşları, Qarabağ müharibəsinin iştirakçıları var. Adı çəkilən şəxslərin çıxarıldığı ev DİN-in balansındadır. Həm də vətəndaşlar üçün heç bir kompensasiya nəzərdə tutulmur.
Leonid Adurov özü kompensasiya verilməsini və ya yeni mənzillə təmin olunmasını tələb edir. Hüquq müdafiəçisi Ələkbər Məmmədov hesab edir ki, bu halda mənzil hüququ pozulub və DİN rəhbərliyinin əməlləri "qanunsuzdur". O, müxtəlif instansiyalara şikayət etmək niyyətindədir.
Leonid Adurov oğlu və gəlininin ölümündən sonra onun himayəsində qalan üç nəvəsini böyüdür ("Turan").
Məsələ ilə bağlı bir gün sonra DİN açıqlama yayaraq bu məlumatı təkzib etdi. DİN İkinci Dünya müharibəsi veteranı Leonid Adurovun nazirlik tərəfindən hüquqlarının pozulması ilə bağlı bəyanatı ilə razılaşmadığını bildirdi.
Nazirlik diqqəti Adurovun mətbuat konfransında söylədiklərinə yönəldib: "Adurov bildirib ki, Xətai rayonu, Kamandar Əhmədov küçəsi, ev 1-də yaşayan 11 ailəyə aprelin 1-dək mənzillərini tərk etmək tapşırılıb. Onun sözlərinə görə, sakinlər başqa mənzillə təmin edilmir". Öz növbəsində DİN Şəxsi Heyətlə İş üzrə İdarənin rəisi Mehman Mehmanov bildirib ki, sözügedən ailələr üçün Nərimanov rayonu 7-ci Köndələn küçəsi, 2074/2077 məhəlləsində hər şəraiti olan ikimərtəbəli bina tikilib və sakinlərə aprelin 1-dək ora köçmək təklif olunub. Mehmanov onu da qeyd edib ki, DİN öz işçilərinə və müharibə veteranlarına hörmətlə yanaşır, onların problemlərinin həlli üçün mümkün olan hər şeyi edir.
|
