Kənd təsərrüfatı texnikası almaq üçün lizinq şərtləri yumşaldılıb. İndi texnikanın ilkin ödənişi 20 faizdən 10 faizə endirilib. Belə ki, alınan malın dəyərinin 10 faizi bəri başdan, digər hissəsi isə 10 il müddətinə ödənilir. Nəticə etibarı ilə ilbəil şərtlər yüngülləşdiyindən lizinqlə kənd təsərrüfatı texnikası götürənlərin sayı artır. Məsələn, yanvarda Aqrolizinq ASC 40 ədəd traktora lizinq verib. Yaz aylarında bu rəqəmin artacağı gözlənir.

Lizinq ilk baxışdan kreditə bənzəsə də, əslində hansısa texnika və ya avadanlığın uzun müddətə istifadəyə götürülməsi deməkdir. Bu müddətdə istifadəçi avadanlığın pulunu ödəyir. Müddət başa çatandan sonra isə onun sahibi olur. Lizinq vasitəsilə texnika və avadanlığı 2, hətta 5 ilə də almaq mümkündür. Bankdan kredit götürəndə isə müddət maksimum 2 il olur. Bu zaman bank girov tələb etsə də, lizinqdə malın özü girovda qalır.

Aqrolizinq Açıq Səhmdar Cəmiyyətinin sədri Əli Bayramov açıqlamasında bildirib ki, hansısa texnikanın alınması üçün bank kreditlərindən istifadə edənlər 25-26 faiz ödəməli olduğu halda, lizinqdə texnikanı 20-21 faizlə, hətta bəzi hallarda 16-17 faizlə də götürmək olar. Yeri gəlmişkən, yaxın zamanlarda mineral gübrələrin güzəştli satış qaydalarında da dəyişiklik gözlənir.