Dünən Tərtər rayon İcra Hakimiyyətinin keçmiş başçısı Sərdar Həmidov Reportyorların Azadlıq və Təhlükəsizlik İnstitutunun mətbuat mərkəzində mətbuat konfransı keçirib. APA-nın xəbərinə görə, Sərdar Həmidov bildirib ki, tədbiri keçirməkdə məqsəd 1992-ci ildə Azərbaycan torpaqları uğrunda gedən döyüşlərdə şəhid olmuş şəxslərin baş daşları və sinə daşlarının oğurlanması barədə ölkə rəhbərliyinə və ictimaiyyətə məlumat verməkdir.
Sərdar Həmidov deyib ki, Ağdərənin Vaquas və Vəng kəndləri arasında gedən döyüşlərdə ümumilikdə 67 əsgər həlak olub. Onlardan 12 nəfərinin meyiti doğmaları tərəfindən tanınaraq aparılıb. Qalan 55 nəfərin isə milliyyətinin azərbaycanlı olduğu dəqiqləşib. Həmin vaxt Tərtər rayon İcra Hakimiyyətinin başçısı vəzifəsində çalışan Sərdar Həmidov şəhidlərin dəfn olunması üçün müvafiq komissiya yaradıldığını, sonra həmin şəhidlərin dəfn olunduğunu bildirib:
"Komissiyaya rayonun axundundan tutmuş mənim müavinimə qədər xeyli şəxs daxil idi. Şəhidləri kəfənlətdirib basdırdıq, onlara mərmər və qranitdən başdaşı, sinədaşı düzəltdirib qoyduq".
Sərdar Həmidov bildirib ki, son 10 ildə şəhid qəbirlərinin ikisi istisna olmaqla hamısının başdaşı və sinədaşları sökülərək oğurlanıb: "Yalnız iki qəbrin başdaşı qalıb ki, onların da sinədaşlarını oğurlayıblar".
Sabiq icra hakimiyyəti başçısı KİV mənsublarına başdaşı və sinədaşları sökülərək oğurlanmış qəbirlərin fotolarını da təqdim edib. O, Azərbaycan prezidentinə və bütün ictimaiyyətə müraciət edərək bununla bağlı tədbir görülməsini xahiş edib.
Tədbirdə iştirak edən hüquq müdafiəçisi, deputat Çingiz Qənizadə faktla bağlı Daxili İşlər Nazirliyinə deputat sorğusu verəcəyini, bu məsələni Milli Məclisin növbəti iclasında qaldıracağını bildirib.
Tərtər rayon İcra Hakimiyyətinin İctimai təşkilatlar və siyasi partiyalarla iş şöbəsinin müdiri Tofiq Hüseynov isə APA-ya açıqlamasında Sərdar Həmidovun dediklərinin böhtan olduğunu iddia edib:
"Onun mətbuat konfransında göstərdiyi şəkilləri harada çəkdiyini bilmirəm, bəlkə gedib Mingəçevirdə çəkdirib? Hamımız müsəlmanıq. Qəbir daşlarını, özü də şəhidlərin qəbir daşlarını kim oğurlaya bilər? Bunlar düz söhbət deyil".
Tofiq Hüseynov rayonda kimsəsiz şəhid qəbirlərinin olduğunu isə təsdiqləyib:
"Onlardan bir qisminin yaxınları gəlib meyitləri apardı. Ancaq qalan qəbirlərin başdaşları yerindədir. Tərtərdə Şəhidlər Xiyabanı tikilib, müharibə veteranlarının abidəsi təmir edilib. Demək istəyirəm ki, bu söhbət məntiqə uyğun deyil".
|
