Bu ilin yanvar ayında Bakı şəhərinin ilkin mənzil bazarında (yeni tikililər) qiymətlər dəyişməyib. Orta qiymət dekabrdakı kimi 1 kv. metr üçün 848 manat təşkil edib. Bu, ötən illə müqayisədə 4%, böhrandan əvvəlki (sentyabr 2008-ci il) dövrlə müqayisədə isə 29% azdır.
"Əmlak Bazarı İştirakçıları" İctimai Birliyinin məlumatına görə, yanvarda ilkin bazarda satışa çıxan yaşayış binalarının sayı dekabrdakı 443-ə qarşı 442 olub - 1 bina satışdan çıxıb, heç bir yeni binanın özülü qoyulmayıb. Tikinti işləri aparan şirkətlərin sayı isə əvvəlki ayda olduğu kimi 155 olub.
Yanvarda Bakı şəhərində satışda olan 442 binanın 32%-də tikinti başa çatıb, 49%-da başa çatmaq üzrədir, binaların 11%-də tikinti işləri başlayıb və ya orta mərhələdədir, 8% binalarda isə tikinti işləri ya dondurulub, ya da ləng gedir.
Binaların 271-də qiymətlər 400-800 manat, 83 binada 801-1200 manat arasında, 64 binada 1201-2000 manat arasındadır, 24 binada qiymətlər 2000 manat/kv. metr həddindən yuxarıdır.
"Əmlak Bazarı İştirakçıları" İB-nin araşdırmaları göstərib ki, alıcı kütləsi hazırda 1 kv. metri 500-600 manat arasında dəyişən yeni tikililərə üstünlük verir. Ötən aylardakı kimi, yeni tikililərdə 3 otaqlı mənzillər daha çox üstünlük təşkil edir, 5 otaqlı mənzillər əsasən şəhərin I zonasında üstünlük təşkil edir, 1 otaqlı mənzillər isə daha çox III zonanın payına düşür.
|
