Dünən Sumqayıt Şəhər Məhkəməsində AXCP Gənclər Komitəsinin üzvü Cabbar Savalanlının həbs olunarkən qanunsuzluğa yol verilməsi haqqında məhkəmə nəzarəti qaydasında şikayətinə baxılıb.
Məhkəmə onun bu şikayətini təmin etməyərək, Avropa Konvensiyasının 5-ci maddəsini (toxunulmazlıq hüququnu) tanımayıb. Bu barədə vəkil Anar Qasımov RATİ-yə məlumat verib.
Bununla belə bu gün məhkəmə prosesinin başlanmasına az qalmış məhkəmə binasının qarşısına toplaşan AXCP Gənclər Komitəsinin üzvləri, eləcə də jurnalistlər ərazidən uzaqlaşdırılıb. Belə ki, polis Sumqayıt şəhərinin Heydər Əliyev parkı adlanan ərazidən yolları bağlayaraq, Sumqayıt məhkəməsinin binasını mühafizə edib. Gənclər məhkəmənin binasından polis və mülki geyimlilər tərəfindən uzaqlaşdırılıblar.
Daha sonra isə dörd nəfər - AXCP Gənclər Komitəsinin sədri Əbülfəz Qurbanlı, fəallar Dəyanət Babayev, Elturan Rüstəmli və Aydın Əliyev saxlanılıb. Xatırladaq ki, Cabbar Savalanlı Cinayət Məcəlləsinin 234.1-ci maddəsi ilə (qanunsuz narkotik maddə saxlama) ittiham olunur. Onu 3 ilə qədər həbs cəzası gözləyir. Polis iddia edir ki, onun üzərindən 0,17 qr tiryək götürülüb. Gənc fəalın tərəfdarları əmindirlər ki, Savalanlı siyasi əsaslarla, xüsusən yanvarın 20-də müxalifətçilərin Şəhidlər Xiyabanına yürüşündə fəal iştirakına görə həbs olunub. Həmin vaxt müxalifətçilərin daşıdığı siyasi plakatlara görə onlar və polis arasında qarşıdurma yaranmışdı. Bundan sonra Savalanlının bir müddət izləndiyi deyilir. Gənc fəalın cəmi 20 yaşı var. Sumqayıt Universitetinin tarix fakültəsinin 3-cü kurs tələbəsidir. O, ötən ilin noyabrında AXCP sıralarına daxil olub.
|
