Mərkəzi Bankın apardığı təhlillərə görə, ölkədə ipoteka kreditlərinə böyük tələbat var və bu mexanizm genişlənməlidir. Bankda düşünürlər ki, bunun üçün daxili bazarın maliyyə imkanlarından istifadə edilməlidir. Mütəxəssislər hesab edirlər ki, ölkəmizdə kreditlərin verilməsi zamanı vətəndaşların müraciətlərinə vaxtında baxılmalı, izafi bürokratiya aradan qaldırılmalıdır. Yəni kreditlərin verilmə prosesində vaxt və çəkilən xərclər minimal həddə çatdırılmalıdır. Bunun üçün elektron ipoteka sisteminin yaradılması üzrə başlanan işlər tamamlanmalı, insan faktorunun rolu aşağı salınmalıdır. İqtisadçı Əli Əlirzayev elektron ipoteka sistemi yaratmağı vacib sayır. Bildirir ki, "Elektron Hökumət haqqında" qanuna əsasən, bütün problemlər hökumətin korporativ idarəetmə sistemi çərçivəsində çözülməlidir. Bu baxımdan da elektron hesabata keçmək məqsədəuyğundur:
"Bu yolla, məsələn, kreditlərin verilmə prosesini sadələşdirmək, onun səmərəliliyini təmin etmək, prosesə nəzarəti gücləndirmək və sairdə müsbət nəticələr mümkündür. Elektron ipoteka sisteminin yaradılması bundan irəli gəlir. Yəni bu sistemlə hər kəsə deyil, yalnız müəyyən adamlara standartlara uyğun olaraq ipoteka kreditlərinin verilməsi, həmin kreditlərin vaxtlı-vaxtında geri qaytarılması, tələb olunan zamanda qaytarılmadıqda kreditlərin verilmə prosesinin dayandırılması, kredit verənlərlə kredit alanlar arasında əlaqələrin təkmilləşdirilməsi və s. mümkündür. Azərbaycanda elektron ipoteka sisteminin yaradılması hökmən vacibdir". Elektron sistemlə vaxta qənaət etmək və əlavə xərclərin qarşısını almaq mümkündür. Ancaq iqtisadçı deyir ki, bununla belə kompüter sisteminin, elektron hesablama prosesinin, elektron nəzarətin, elektron idarəetmənin reallaşdırılması üçün elmi əsaslandırılmış xüsusi proqramlar hazırlanmalı və işə salınmalıdır.
|
