MDB məkanında mobil rabitə bazarlarının araşdırılması göstərir ki, Gürcüstanda (bu ölkə MDB-ni ötən il tərk edib) mobil rabitə vasitəsilə danışığın hər dəqiqəsi üçün təxminən 15 sent ödəmək lazım gəlir. İkinci ən bahalı mobil tarifi Qazaxıstandadır. Bu ölkədə mobil şirkətləri abunəçilərdən orta hesabla hər dəqiqə danışıq üçün 13 sent alırlar. "İqtisadi forum" jurnalı Rusiya mənbələrinə istinadən bildirir ki, Azərbaycan mobil telefon tarifinin yüksəkliyinə görə MDB-də üçüncüdür. Ölkə sakinlərinə mobil telefonla danışığın hər dəqiqəsi təxminən 12 sentə başa gəlir.
Məlumat üçün: Azərbaycanda 3 mobil rabitə operatoru fəaliyyət göstərir. Mobil rabitə bazarının əsas payı Azersell şirkətinin payına düşür.
Qiymətlərin bahalığına görə növbəti yerləri Moldova və Ermənistan tutur. Bu ölkələrdə mobil rabitə tarifinin dəqiqəsi uyğun olaraq 11 sent və 10 sentdir. Danışıq dəyəri Belarusda 8, Ukraynada 7 sent təşkil edir. Tacikistan və Qırğızıstanda qiymətlər eynidir - 5 sent.
Tacikistandan artıq bu ilin fevral ayından etibarən mobil rabitə danışıqlarına aksiz vergi tətbiq edilir. Bundan sonra abunəçilər əlavə olaraq 3% həcmində vergi ödəməli olacaqlar. Ölkənin Maliyyə Nazirliyinin məlumatına görə, mobil rabitə operatorlarının illik gəliri 300 milyon dollar təşkil edir. Rusiyada danışıq qiymətləri təxminən 4 sent təşkil edir. Ən ucuz danışıq tarifi Özbəkistandadır. Bu ölkənin sakinləri mobil danışığın hər dəqiqəsi üçün 2 sent ödəməli olurlar.
Ekspertlərin rəyinə görə, MDB ölkələrinin mobil rabitə bazarı Rusiyadan xeyli geri qalır. Rusiya isə hələ də Avropaya çata bilməyib. MDB ölkələrinin əksəriyyətində ən azı bir Rusiya operatoru fəaliyyət göstərir. Ən yaxşı rəqabətin olduğu bazar Ukrayna hesab olunur. Artıq bütün tezliklər tutulduğundan mobil rabitə operatorları yeni xidmət təklif etməyə üstünlük verirlər. Qazaxıstanda 4 nəsil rabitə xidməti tətbiq edilir. Özbəkistan, Tacikistan, Ermənistan və Qırğızıstanda videozəng xidmətləri geniş yayılıb.
Qafqaz ölkələrində Orta Asiya ilə müqayisədə az sms yazmağa üstünlük verirlər. Əvəzində nömrələrə daha çox diqqət ayırırlar. Gürcüstanda köhnə nömrəni saxlamaqla operatoru asanlıqla dəyişmək olar.
|
