Əmək və Əhalinin Sosial Müdafiəsi Nazirliyi vətəndaşların müraciətlərinə baxılması sahəsində vəziyyəti araşdırmaq üçün zona müşavirələri praktikasını davam etdirir. Nazirliyin ictimaiyyətlə əlaqələr sektorundan bildirilir ki, son olaraq Yevlax şəhərində belə bir müşavirə keçirilib və burada Bərdə, Yevlax, Mingəçevir, Ağdam, Tərtər, Goranboy, Ağdaş, Göyçay, Zərdab və Ucarın müvafiq qurumları iştirak ediblər. Nazirlikdən bildirilir ki, əhaliyə xidmətin səviyyəsinin yüksəldilməsi, müraciətlərə diqqət və həssaslıqla yanaşılması - prioritet önəm kəsb edir.
Yevlax zona müşavirəsində əmək qanunvericiliyinə əməl olunmasına dövlət nəzarəti, ünvanlı sosial yardımın təyinatı və ödənişi, tibbi-sosial ekspertiza müayinələri, əlillərin reabilitasiyası, işsiz və işaxtaran vətəndaşların məşğulluğunun təmin olunması barədə söz getmişdir. Bəzi müsbət nəticələr qeyd olunmaqla, vətəndaşlara xidmət sahəsində nöqsanlar da diqqətə çatdırılıb.
Qeyd olunub ki, yerli qurumlar tərəfindən vətəndaş müraciətlərinə laqeyd yanaşma, onlara münasibətdə qeyri-mədəni davranış halları var. Bunlar insanlarda ümumi narazılıq halları yaradır və onlar müxtəlif instansiyalara şikayət məktubları ünvanlamağa məcbur olurlar.
Nazirlikdən bildirilir ki, fəaliyyətində nöqsanlara yol verən əməkdaşlar haqqında ciddi tədbirlər görülür. Bu tədbirlər bundan sonra da davam etdiriləcək. Nöqsanlara yol verən əməkdaşlar qanunvericiliyin tələblərinə uyğun şəkildə sərt cəzalanacaqlar.
Yevlax zona müşavirəsində vətəndaşların müraciətinə diqqət və qayğı ilə yanaşılması barədə ciddi tapşırıqlar verilib.
|
