Nə vaxtdan bəri mediada hallandırılan bu məsələ yaşadığımız çağın ən səs-küylü fırıldaqlarından biridir. Mənzil almaq, yaşayışlarını yaxşılaşdırmaq istəyən vətəndaşların pullarını qəbul ediblər, lakin onlara mənzil verməyiblər. Onlar, sadəcə, aldadılıblar. Fırıldağın təşkilatçısı "Gen" MMC deyilən tikinti şirkətidir. Görünür, insan, vətəndaş onlar üçün bir çürük qoz qabığı da deyilmiş. Qanunlar, dövlət, insaniyyət, mənəviyyat onlar üçün heç nəymiş.
İndi bu aldadılmış vətəndaşlar dövlət idarələrinin qapılarına düşüblər. Qanun işləməyəndə, qanunun yalnız quru adı olanda, cəzasızlıq şəraiti hökm sürəndə belə olur. Fırıldaqçılar cəsarətlənir. Vətəndaş isə aşağılarda haqqını müdafiə edə bilməyəndə ədalət axtarışı ilə ən ali instansiyaya - Prezident Aparatının qapısına yığışır.
Həmin fırıldaqçı "Gen" MMC tikinti şirkəti tərəfindən aldadılan bir qrup vətəndaş çərşənbə günü Prezident Aparatı qarşısında toplaşıblar. Toplaşanlar arasından üç nəfəri administrasiyanın qəbul otağına dəvət ediblər. Qadınlar qayıtdıqda heç kimin onları dinləmədiyini və DİN-ə getməyin tövsiyə olunduğunu bildiriblər. Burada onları daxili işlər nazirinin müavini Vilayət Eyvazovun qəbul edəcəyi deyilib.
Nə isə, həmin vətəndaşlar polisin müşayiəti ilə Daxili İşlər Nazirliyinin binasına yollanıblar.
Aksiya iştirakçılarından biri - Yadigar Rəhimov "Turan"a bildirib ki, Eyvazov vətəndaşları qəbul edib və marta qədər onların problemlərinin dövlət səviyyəsində həll ediləcəyinə söz verib. Bu da mart - qarşıda bir ay var, bunu aldananlar da gözləsin, biz də gözləyək.
Arayış: "Gen" MMC şirkəti 300 nəfərdən çox vətəndaşın pulunu alaraq, onlara mənzil tikməyi vəd edib. Lakin bu insanlar mənzillə təmin olunmayıblar. Ötən il şirkət rəhbərləri mühakimə olunub, lakin aldadılmış vətəndaşlar nə ev, nə də pullarını almayıblar...
|
