"Azərbaycan Dəmir Yolları" QSC-də 2010-cu ilin yekunlarına həsr olunmuş geniş kollegiya iclası keçirilib. QSC-nin mətbuat katibliyinin rəisi Nadir Əzməmmədov bildirib ki, Cəmiyyətin sədri Arif Əsgərov çıxışında qeyd edib ki, ötən il nəqliyyat sektorunda genişmiqyaslı islahatlar həyata keçirilib, böyük nailiyyətlər əldə edilib:
"Hesabat ilində dəmir yolu stansiyalarından 14,9 mln. ton yük göndərilib ki, 2009-cu ilə nisbətən bu göstərici 12,5% artıb. Ümumi yük daşımaları 2010-cu il ərzində 22,3 mln. ton təşkil edib və əvvəlki ilə nisbətən yük daşımaları 7,5% çoxalıb. Yol üzrə sərnişin daşımaları 4 802,4 min nəfər təşkil edib, o cümlədən birbaşa əlaqə üzrə 316,8 min nəfər, yerli əlaqə üzrə 1 946,8 min nəfər olub. Ümumi sərnişin dövriyyəsi 917,1 mln. sərnişin/km təşkil edib".
Arif Əsgərov iclasda "Dəmir yolunda təhlükəsizlik tədbirlərinin həyata keçirilməsi haqqında", Azərbaycanın Korrupsiyaya qarşı Mübarizə üzrə Komissiyasının 2011-ci il yanvarın 27-də keçirilmiş geniş iclasında verilmiş tapşırıqlarla əlaqədar da söz açıb. Bildirib ki, fevralın 17-də Nəqliyyat Nazirliyində şəffaflığın artırılması və korrupsiyaya qarşı mübarizə üzrə Milli Strategiyanın həyata keçirilməsi ilə bağlı toplantı keçirilib, Kollegiyanın işində dövlət başçısının tövsiyə və tapşırıqlarına uyğun olaraq nazirliyin müvafiq strukturlarının fəaliyyətində şəffaflığın artırılması üzrə qarşıda duran vəzifələr təhlil olunub, qarşıya mühüm vəzifələr qoyulub:
"Şəffaflığın daha da artırılması, korrupsiyaya, süründürməçiliyə qarşı mübarizə sahəsində tədbirlər bundan sonra da intensiv şəkildə davam etdirilməli, həmçinin dəmir yolunda təhlükəsizlik məsələlərinə diqqət artırılmalıdır".
|
