İnzibati Xətalar Məcəlləsinin bir sıra maddələrinə dəyişiklik edildi. Əsasən də sürücülərin bəzi qayda pozuntularına görə cərimələrin miqdarı artırıldı. İXM-in 151-ci maddəsinə edilən dəyişikliklərə görə, sürücünün törətdiyi bir sıra inzibati xətalara görə verilən balların miqdarı çoxaldı. Əgər sürücü nəqliyyat vasitəsini alkoholdan, narkotik vasitələrdən, psixotrop maddələrdən istifadə olunması sayəsində sərxoş vəziyyətdə idarə edərsə, buna görə 5 bal, nəqliyyat vasitələrinin istismar qaydalarının pozulmasına görə 4 balla, sərxoşluğun yoxlanılması üçün təklif olunan müayinədən boyun qaçırılması 5 balla qiymətləndiriləcək.
Digər dəyişiklik dayanacaqlarda saxlama ilə bağlıdır. Yeniliyə əsasən, nəqliyyat vasitələri müvafiq icra hakimiyyəti orqanının mühafizə olunan dayanacağında saxlanmalıdır. Dayanma və durma qaydalarını pozduğu üçün avtomobili müvafiq icra hakimiyyəti orqanının duracağına gətirilən sürücü inzibati cəriməni və nəqliyyat vasitəsinin duracağa gətirilməsi, saxlanılması haqqını həmin yerdə ödəyə bilər. Bu halda sürücüyə qəbz veriləcək və nəqliyyat vasitəsi sürücüyə qaytarılacaq.
İnzibati Xətalar Məcəlləsinə edilən başqa bir dəyişikliyə görə, şəhərdaxili, şəhərlərarası və beynəlxalq avtobus marşrutlarında müəyyən edilmiş hərəkət cədvəlinə və hərəkət sxeminə əməl etməyən, "Taksi" tanınma nişanı, taksometr və s. göstəriciləri olmadan sərnişin daşıyan, tarifləri müəyyən edilmiş tariflərdən çox göstərən, avtobuslarda siqaret çəkən, müntəzəm şəhərdaxili marşrutlarda daşıma prosesləri ilə bilavasitə əlaqəsi olmayan audio cihazlardan istifadə edən, daşıma sənədləri olmadan sərnişin daşıyan, marşrutlarda və taksilərdə sərnişin və baqaj yerlərinin sayına, baqaj kütləsinə riayət etməyən şəxslər 40 manatdan 50 manatadək cərimə olunacaqlar.
Əmtəə təyinatlı yüklərin əmtəə-nəqliyyat qaiməsi ilə rəsmiləşdirilmədən daşınmasına görə 20 manat, lisenziyasız sərnişin və yük daşınmasına görə 100 manat, lisenziya şərtlərinin pozulmasına görə 50 manat, qalaq yüklərin, tikinti materiallarının, heyvanların və ya quşların, çörək və çörək-bulka məmulatlarının daşınma şərtlərini pozanlar 40 manatdan 50 manatadək, pasport olmadan avtovağzal fəaliyyəti ilə məşğul olanlar 1500 manat, avtovağzalın fəaliyyətinin müvafiq kateqoriyaya uyğun texnoloji prosesinin pozulmasına görə 500 manat cərimələnəcəklər.
|
