Misiri 30 ilə yaxındır idarə edən Hüsnü Mübarək getdi. Payıza qədər duruş gətirə bilmədi. Misir xalqı öz şanlı inadı ilə buna razı olmadı. Dünya xəbər agentliklərinin paytaxt Qahirədən vitse-prezident Ömər Süleymana istinadən verdikləri xəbərə görə, Mübarək Misir prezidenti postunu tərk edib. Onun, bir məlumata görə, Birləşmiş Ərəb Əmirliklərinə getdiyi, digər bir məlumata görə, Misirin Qırmızı dəniz sahilindəki Şərm-əş-Şeyx kurort şəhərindəki qış iqamətgahında olduğu bildirilir. "İndiki ağır günlərdə prezident istefaya çıxmaq və bütün səlahiyyətlərini ordu hərbi komandanlığının Ali Şurasına verməyi qərara almışdır", - deyə Ömər Süleyman milli televiziya ilə qısa məlumatında açıqlamışdır.
Dünyanın aparıcı telekanalları Təhrir meydanında milli bayraqları yellədərək şadlıq edən nümayişçiləri, küçələri fit verərək ötüb keçən avtomobilləri göstərirlər. "Misir azaddır!" deyə onlar qışqırırlar. Havaya güllə və əlvan fişənglər atılır. İnsanlar qucaqlaşıb öpüşür, bir-birlərini təbrik edir, küçələrdə və meydanlarda halay gedirlər.
Mübarəkin gedişi avtoritarizm epoxasının sonunun gəldiyinin bir göstəricisidir. Onun son günlərədək dirənməsi isə qonşu ərəb ölkələri - Səudiyyə Ərəbistanı, Suriya, Liviya, Yəmən kimi ölkələrin liderlərinin təkidi əsasında olduğuna ciddi baxılır. Onlar duyuq düşmüşdülər ki, əgər Mübarək getsə, onlar da duruş gətirə bilməyəcək və getməli olacaqlar. Çox böyük sərvəti qamarlamış olan bu liderlər fantastik dəbdəbə içərisində yaşasalar da, xalqlarının böyük hissəsi yoxsulluğun pəncəsində əzab çəkirdilər. Mübarək getdi, indi digər harınlaşmış oğru liderlərin növbəsidir!
Bir məsələ də var: Mübarək harayadək gedəcək? Uzağa gedə bilməz. Onun sabah bir çox diktatorlar kimi Misirdə müttəhimlər kürsüsündə əyləşəcəyi şübhə doğurmur. Bu adam otuz illik hakimiyyəti ərzində Misir sərvətlərinin hesabına özünə 67 milyard dollarla hesablanan fantastik sərvət yığıb. Onu xalqdan mənimsəyib. Bunun hesabı sorulacaq. Dünya biz düşündüyümüz kimi o qədər də geniş deyil. İndi özünə hörmət edən heç bir ölkə diktorlara, öz xalqını soyanlara arxa durmur, bu gün üzünə gülürsə, sabah vəziyyət dəyişəndə arxasını çevirir. Sakrozi Ben Əliyə arxa çevirdiyi kimi.
Bir sual daha - bu oğrunun bizim Xırdalandakı heykəlinin ömrü nə qədər olacaq? Axı zaman çox sürətlə dəyişir.
|
