Qış aylarında infeksion xəstəliklərin yoluxma səviyyəsi yüksəlir. Xüsusilə hava-damcı yolu ilə yoluxanların sayı artır. Avropanın bir neçə ölkəsində həyəcan təbili çalınıb. Bolqarıstanda virusun kütləvi yayılma səbəbindən məktəblərdə dərslər təxirə salınıb. Qonşu Rusiya və Gürcüstanda donuz qripinə yoluxma halları aşkarlanıb. Türkiyədə isə qrip xəstəliyi dərmanlara qarşı o qədər yüksək əzm nümayiş etdirir ki, xəstəliyə "keçi qripi" adı veriblər. Keçi kimi inadkar olan qrip bir neçə həftə xəstələnən şəxsdən əl çəkmir. Bu arada onu da qeyd edək ki, Ümumdünya Səhiyyə Təşkilatı da "donuz qripi"nin mutasiya etdiyi və hazırda H3N2 virusu kimi özünü göstərdiyi barədə məlumat yayıb...
Qonşu ölkələrdə bunlar varsa, deməli, bizim ölkəyə də keçməsi istisna deyil. Respublika Taun Əleyhinə Stansiyanın direktor müavini Şair Qurbanov isə Azərbaycanda qripə yoluxma hallarında əvvəlki illərə nisbətən artım olmadığını söyləyir. Deyir ki, vəziyyət sabitdir, çünki havalar soyuq və sərt keçmir.
Ölkədə H1N1 virusuna yoluxma halı hələlik yoxdur. Ş.Qurbanov deyir ki, xaricdən ölkəyə virusun daxil olmamasına çalışmalıyıq. Bu gün Rusiya və Gürcüstanda vəziyyət bir qədər gərginləşib. Amma sərhəd-keçid məntəqələrində ölkə ərazisinə gələn hər kəs müayinə olunur:
"Özü də təkcə "donuz qripi" deyil, digər xəstəliklərlə bağlı da müayinələr aparılır. İnsanların daha çox olduğu yerlərdə hava-damcı yolu ilə virusun yayılma riski böyükdür. Elə ölkə var ki, orada "quş qripi", digərində "donuz qripi", bir başqasında taun xəstəliyi qeydə alınıb. Buna görə də xaricdən gələn hər kəs ciddi müayinədən keçirilir. Amma indiyədək bu əlamətlərlə heç kəs müraciət etməyib".
Ş.Qurbanovun sözlərinə görə, xaricdən gələn bütün vətəndaşlar sərhəd-keçid məntəqələrində yoxlanır: "Virusa yoluxan hər hansı şəxs aşkarlandıqda dərhal 8-10 gün nəzarətdə saxlanacaq".
Söhbət əsnasında onu da öyrəndik ki, ötən il Ümumdünya Səhiyyə Təşkilatı tərəfindən verilən vaksinlərin az hissəsindən istifadə edilib. Ölkədə "donuz qripi"nin yayılma ehtimalı zəif olduğundan ancaq risk qrupuna daxil olan şəxslər peyvənd olunub. Qalan vaksinlər isə xüsusi şəraitdə saxlanır. Bu vaksinlərin istifadə müddəti qalır və ehtiyac olduğu təqdirdə bu il də peyvənd aparıla bilər: "Ölkədə kifayət qədər dərman preparatları var və lazım olduqda istifadə ediləcək".
Mütəxəssis onu da vurğuladı ki, qrip virusundan qorunmaq üçün immunteti artıran qidalar qəbul etmək, zərərli vərdişlərdən - siqaretdən, spirtli içkilərdən uzaq olmaq faydalı olardı.
|
