Dünən saat 17 radələrində Yasamal rayonu Şərifzadə küçəsində yaşayış binasında yanğınla müşayiət olunan partlayış baş verdi. FHN Yanğından Mühafizə Xidmətindən APA-ya verilən məlumata görə, hadisə İnşaat Universitetinə məxsus yataqxanada qeydə alınıb. Hadisə yerinə 15 yanğınsöndürən maşın cəlb edilib. Yataqxanada olan tələbələr təxliyə edilib. Həyata keçirilən tədbirlərin köməyi ilə yanğının qarşısı alınıb.
Baş verən yanğında bir nəfər ölüb. Bu barədə Yasamal polis idarəsindən bildirilib. Məlumata görə, həyatını itirən şəxs yataqxanada məskunlaşan məcburi köçkün Rəhman Cəfərovdur. Hadisə zamanı daha 7 sakinin xəsarət aldığı bildirilir.
Bakı şəhər Təcilli Tibbi Yardım Stansiyasının baş həkim müavini Rauf Nağıyev APA-ya bildirib ki, hadisə yerindən müxtəlif xəsarətlərlə bir neçə adam xəstəxanalara aparılıb.
Yanğına qaz sızmasından doğan ani partlayış səbəb olub.
|
