Ötən həftə Gürcüstanın paytaxtı Tbilisidə kişi və qadın cüdoçular arasında dünya kubokuna yekun vurulub. Yarışa 20 idmançı ilə qatılan Azərbaycan yığması Vətənə 1 qızıl və 1 bürünc medalla qayıdıb.
Baş məşqçimiz Ağayar Axundzadənin rəhbərlik etdiyi komanda üzvlərindən İlqar Mişkiyev (60 kq) bütün rəqiblərinə qalib gələrək, fəxri kürsünün ən yüksək pilləsinə qalxıb. Ondan fərqli olaraq, yarımfinal səddini aşa bilməyən Elxan Rəcəbli (81 kq) bürünc medalla kifayətlənib. Hər iki cüdoçumuz müvafiq olaraq 100 və 40 lisenziya xalı qazanıblar.
Ramin Qurbanov (90 kq) 5-ci, Şahin Məmmədov (100 kq) isə 7-ci yeri tutublar. Qeyd edək ki, 22 ölkənin mübarizə apardığı dünya kubokunda Azərbaycan komanda hesabında 5-ci yeri tutub. Yığmamızdan əvvəlki yerlər Rusiya, Gürcüstan, Ukrayna və Qazaxıstan millilərinə nəsib olub.
Cüdo üzrə yığma komandamız hazırlıqla əlaqədar Norveçə yollanacaq. Komandamız növbəti təlim-məşq toplanışını Skandinaviya ölkəsində keçirəcək. Səfərə fevralın 9-da yollanırlar. Yığmanın heyətində İlqar Mişkiyev (60 kq), Tərlan Kərimov (66 kq), Renat Mirzəliyev (73 kq), Elnur Məmmədli (81 kq), Elxan Məmmədov, Ramin Qurbanov (hər ikisi 90 kq), Elmar Qasımov (100 kq), Emil Tahirov (+ 100 kq), Kifayət Qasımova (57 kq) və Ramilə Yusubova (63 kq) yer alıblar.
Norveçdə hazırlıq 1 həftə davam edəcək. Məşqlər başa çatdıqdan dərhal sonra isə cüdoçularımız ordan birbaşa Almaniyanın Düsseldorf şəhərinə yollanacaq və burada Qran-pri turnirində iştirak edəcəklər. Qeyd edək ki, "London-2012"yə lisenziya xalı verən Qran-Pri yarışı fevralın 19-20-də olacaq.
|
