Səhiyyə Nazirliyinin praktik tibb və əczaçılıq fəaliyyəti ilə məşğul olan həkimlərin sertifikasiyası məqsədilə 26 yanvarda keçirilən imtahanda uğur qazananların adları artıq bəllidir. Əslində isə 54 həkimdən uğur qazanan 5 həkim olub. 49 həkim isə bu sahəyə yararsız sayılmalıdır. Təbii ki, Avropa yanaşmasına görə. Bizim yanaşmaya görə, onlar işləyəcəklər.
Nazirliyin mətbuat xidmətindən verilən açıqlamaya əsasən, dermatovenerologiya və kardiologiya ixtisasları üzrə imtahanlarda 54 həkim iştirak edib. Nəticələrə əsasən, 54 nəfərdən 2-si növbəti mərhələyə keçid üçün tələb olunan 60 balı toplaya bilməyib. Bu həkimlərdən bir nəfər mümkün 100 baldan 55, 1 nəfər 43, 24 nəfər 90-99, 12 nəfər 80-89, 6 nəfər 70-79, 3 nəfər 60-69 bal toplayıb. 5 həkim isə 100 sualın hamısına düzgün cavab verərək maksimum nəticə göstərib.
İmtahanın şərtlərinə əsasən, həkimlər 3 saat ərzində 100 sualdan ən azı 60 suala düzgün cavab verməlidir. Hər sual 1 balla qiymətləndirilir. Bu şərti ödəyən həkimlər növbəti mərhələyə - 5 il müddətinə sertifikat almaq üçün müsahibəyə buraxılır. İmtahanda 60 baldan aşağı nəticə göstərənlər isə yenidən imtahan verməlidir. İkinci imtahanda da tələb olunan keçid balını toplaya bilməyən həkimlər praktik tibb fəaliyyəti göstərə bilməzlər. Onlar yalnız bir müddət də hazırlaşıb yenidən imtahan verməli və sertifikasiya üçün tələb olunan balı toplamalıdırlar.
Bu prosedurda diqqətimizi çəkən o oldu ki, misal üçün, İtaliyada imtahanlarda 100 sualdan 99-na cavab verib, yalnız 1-nə cavab verə bilməyən həkim praktik fəaliyyətə buraxıla bilməz. Orada məsələ bu şəkildə qoyulur: Birdən pasiyentin problemi həmin 1 sualla bağlı oldu, onda necə? Bizdə isə 100 sualdan 40 sualı bilməmək olar və bu hal milli səhiyyəmizdə məqbul sayılır...
|
