Ötən həftə Bakıda keçirilən cüdo üzrə "World Masters" turniri Azərbaycan yığması üçün uğurla başa çatıb. 41 ölkədən gəlmiş ən güclü idmançının mübarizə apardığı turnirdə ölkəmizi 7 idmançı təmsil edib. Yarışın ilk günü 2 bürünc medal qazanan Azərbaycan yığması turnirin son günündə daha 2 qızıl medala sahib olub. Belə ki, Olimpiya çempionumuz Elnur Məmmədli (81 kq) və dünya çempionatının bürünc mükafatçısı Elxan Məmmədov (90 kq) bütün rəqiblərinə qalib gələrək, fəxri kürsünün ən yüksək pilləsinə qalxıblar.

1/8 finalda rusiyalı Siracuddin Maqamedovu, 1/4 finalda Safuan Attafı (Mərakeş) məğlub edən Elnur Məmmədli yarımfinalda böyük britaniyalı Euan Bartona qalib gəlib. Cüdoçumuz həlledici görüşdə isə Leandoro Quylheyro (Braziliya) üzərində tamiz qələbə qazanaraq, 2011-ci ilə uğurla başlayıb.

Elxan Məmmədov isə 1/8 finalda Daiki Nişiyamadan (Yaponiya), 1/4 finalda Varlam Lipartelianidən (Gürcüstan) və yarımfinalda Takaşi Onodan (Yaponiya) güclü olub. Həmyerlimiz finalda dünya çempionu İlias İliadis (Yunanıstan) üzərində ipponla qələbə qazanıb. Fəxri kürsünün ən yüksək pilləsində yer alan Elnur Məmmədli və Elxan Məmmmədov qızıl medalla yanaşı, London-2012-yə 400 lisenziya xalı da qazanıblar. Bu yarışdakı qazandıqları uğurlu nəticədən sonra Elxan dünya reytinqində 3-cü, Elnur isə 12-ci pilləyə qalxıb.

İlqar Muşkiyev (60 kq) və Tərlan Əhmədov isə bürünc medallara sahib olublar.

Elmar Qasımov (100 kq) 1/4 finalda, Emil Tahirov (100 kq) isə ilk görüşdəcə uduzaraq mükafatçıar sırasına düşə bilməyiblər. Beləliklə, 2 gün davam edən usta cüdoçular arasında turnirin yekununa əsasən, kişilərdən ibarət Azərbaycan yığması 2 qızıl və 2 bürünc medalla Rusiya, Koreya, Monqolustan, Çin və Özbəkistanı qabaqlayaraq, 41 ölkə arasında III olub. Ümumi komanda hesabında Yaponiya (3 qızıl, 5 gümüş və 6 bürünc) birinci, Fransa isə (3,1,0) ikinci yeri tutub.