Sankt-Peterburqda keçirilən "Birlik Kuboku" turniri davam edir. Sayca 19-cu olan ənənəvi yarışda Azərbaycanı son ölkə çempionu "İnter" klubu təmsil edir.

Yarışda iştirak edən 16 komanda mübarizəyə qrup mərhələsindən başlayıblar. "İnter" bu mərhələdə Qırğızıstanın "Neftçi", Tacikistanın "İstiqlol" və Moldovanın "İskara-Stal" klubları ilə üz-üzə gəlib. Kaxaber Sxadadzenin başçılıq etdiyi "İnter" "Birlik Kuboku"na darmadağınla başladı.

Azərbaycan çempionu Sankt-Peterburq İdman Kompleksində baş tutan ilk matçda "Neftçi"nin qapısından 3 cavabsız top keçirib. Bakı klubu II turda "İstiqlol"la qarşılaşıb. Bu oyun da komandamızın böyük hesabla qələbəsi ilə başa çatıb - 3:0. Son turda Moldovanın "İskara-Stal" klubu ilə qarşılaşan Kaxaber Sxadadzenin komandası rəqibə 1:0 hesabı ilə qalib gəlib. Bunanla da 1/4 finala vəsiqəni matçdan əvvəl təmin edən "İnter" qrup mərhələsini 100 faizli nəticə ilə və qol buraxmadan başa vurub.

19-cu "Birlik Kuboku"nun ilk mərhələsini qrup birincisi kimi başa vuran "İnter" 1/4 finalda Ermənistan təmsilçisi "Mika" ilə üz-üzə gəlib. Turnirdə keçirdiyi ilk 3 oyunda rəqiblərini "quru hesab"la məğlub edən "İnter" qələbə seriyasını prinsipial matçda da davam etdirib. Azərbaycan çempionu "Neftçi" və "Xəzər-Lənkəran"ın əsasını qoyduğu ənənəni davam etdirib. Qeyd edək ki, "Neftçi" Sankt-Peterburda keçirilən yeganə turnirin qalibi olmaqla, bu şəhərin Azərbaycan komandası üçün uğurlu olduğunu göstərmişdi. "Neftçi" isə "Birlik Kuboku"nda ermənilərin dərsini verməkdə ixtisaslaşıb. Yanvarın 19-da keçirilən matç Azərbaycan çempionlarının "Birlik Kuboku"nda ermənilərlə 3-cü görüşü idi. Həmin qarşılaşmaların qəhrəmanı isə "Neftçi" olmuşdu. Xatırladaq ki, 2005-ci ildə "Neftçi" və "Pünik" qarşılaşmışdı. Bakılılar həmin il 2:0 hesabı ilə qalib gəlsələr də, 2006-cı ildə təkrar dueldə İrəvan klubu meydana çıxmaqdan imtina etdi. Həmin vaxt texniki qələbəyə sevinən "Neftçi" sonradan kubokun sahibi oldu. Əslində "Mika"nın turnirə gəlməsində elə "Neftçi"nin də əməyi var. "Flaqman" Ermənistan çempionunun başına elə oyun açıb ki, onlar çempion olsa da, Rusiyaya gəlməkdən qorxurlar. "Pünik"in qorxusu digər mükafatçılar "Banans"la "Uliss"ə də siyarət edib. Onlar da yarışdan imtina etdiklərindən turnirə 4-cü pillənin sahibi olan "Mika" göndərilib.

"Mika" ilə görüşdə son Azərbaycan çempionu yalnız 30 dəqiqə rəqibin müqaviməti ilə üzləşib. Bundan sonra rəqibin qapısından 2 top keçirən "İnter" fasiləyə üstün vəziyyətdə çıxıb. Bakı klubu fasilədən sonra da yaxşı oyun göstərərək, Ermənistan komandasını darmadağın edib - 4:0. Beləliklə, yarımfinala vəsiqə qazanan "İnter" növbəti rəqibini gözləməli olub.

Komandamızın rəqibi "Zenit" (Rusiya) və HİK (Finlandiya) görüşündən sonra məlum olub. 2:1 hesabı ilə HİK-ə qalib gələn Rusiya komandası yarımfinalda "İnter"ə rəqib olub.

"İnter" və "Zenit" arasında görüş dünən Bakı vaxtı ilə 18:00-da başlandı. Qələbə paradını uğurla davam etdirən "İnter" "Zenit"i böyük hesabla darmadağın etdi - 5:0!

Beləliklə, "İnter" finaldadır.