Naxçıvan Muxtar Respublikasının (NMR) dövlət idarələri jurnalistlərin informasiya sorğularına cavab vermir. "Turan"ın məlumatına görə, Reportyorların Azadlıq və Təhlükəsizlik İnstitutunun (RATİ) əməkdaşı Rəsul Cəfərov "Jurnalistlərin NMR-də informasiya əldə etmək təşəbbüsləri" mövzusunda araşdırma aparıb.
Cəfərovun sözlərinə görə, NMR dövlət qurumları sorğulara cavab vermir və buna görə layihəni başa çatdırmaq və yekun hesabat hazırlamaq mümkün olmur.
O qeyd edib ki, layihə çərçivəsində iki hesabat hazırlanması nəzərdə tutulur. Birinci hesabat noyabrın əvvəllərində hazırlanıb və burada NMR dövlət orqanlarının veb-saytlarının olub-olmaması ilə bağlı keçirilən monitorinqin nəticələri əksini tapıb. Aşkar olunub ki, NMR-in 40 dövlət idarəsindən cəmi 5-nin veb-saytı var.
Mövcud veb-saytlardan ən normal fəaliyyət göstərən NMR Rabitə və İnformasiya Texnologiyaları Nazirliyinin internet-resursudur.
İnformasiya sorğularında saytların olmamasının səbəbləri, sayt varsa, ondan istifadə fəallığının səviyyəsi barədə məlumat istənilib.
Bundan başqa, NMR Ədliyyə Nazirliyinə də məhbusların vaxtından əvvəl azad edilməsi ilə bağlı sorğu göndərilib. Naxçıvan şəhər İcra Hakimiyyətindən kütləvi aksiyaların keçirilməsi üçün nəzərdə tutulan yerlər barədə məlumat istənilib.
Lakin üç ay ərzində 25 sorğuya bir cavab belə gəlməyib. "Bu, layihənin tamamlanmasını gecikdirir, belə ki, yekun hesabat hazırlamağa imkan vermir", - deyə Cəfərov bildirib.
O, informasiya əldə etmək hüququnun təmin edilmədiyi üçün NMR dövlət orqanlarına qarşı məhkəmə iddiaları qaldırmağa hazırlaşır. İlk növbədə Rabitə və İnformasiya Texnologiyaları Nazirliyinə qarşı iddia qaldırılacaq. Belə ki, nazirlik digər idarələrin veb-saytlarının yaradılmasını təmin etmir. İkinci iddia NMR Ədliyyə Nazirliyinə qarşı veriləcək. Hazırda məhkəmə iddiaları hazırlanır, - deyə Cəfərov qeyd edib. O, bu məhkəmənin Naxçıvanda deyil, Bakıda keçirilməsini vacib sayır.
|
