Qadın Hüquqlarını Müdafiə Cəmiyyəti "Narkotik istifadəçilərinin müdafiəsinə alternativ yanaşma və ictimai fikrin formalaşması" layihəsini başa çatdırıb və bu işin yekunlarına dair "Park İNN" otelində mətbuat konfransı keçirdi.
Layihə ölkənin bir sıra şəhər və rayonlarını əhatə edib, tədbirlərə polis, prokurorluq, vətəndaş cəmiyyəti institutlarının təmsilçiləri qatılıblar. "Həbsxanalarda apardığımız monitorinqlər zamanı məhkumların 40%-ə qədərini narkotik istifadəçilərinin təşkil etdiyini aşkarladıq. Vətəndaşın başqa cinayəti yoxsa, təkcə narkotik istifadəçisi olmasına alternativ yanaşma lazımdır. Narkotikdən istifadəyə görə CM-də cəza nəzərdə tutan 234.1 maddənin tətbiqi insan haqlarının pozulmasıdır. Bu maddə ilə verilən cəza yüngülləşdirilməlidir", - deyə cəmiyyətin sədri Novella Cəfəroğlu bildirib.
Nazirlər Kabineti yanında narkotik vasitələrə qarşı mübarizə komissiyasının üzvü Araz Əliquliyev narkotik istifadəçiliyinə qarşı mübarizədə hüquqi mübarizəni yetərli saymayıb, bu bəlanın dünyanı təhlükəyə atdığını deyib.
234.1 maddənin ləğvinə gəlincə, Əliquliyev buna alternativ olaraq ölkədə tibbi-sosial strukturun olmamasını əsas gətirərək, bu addımı atmağın zərərli olacağı barədə xəbərdarlıq edib.
Ölkədə ümumi narkomanların sayına gəlincə, DİN təmsilçisi Tanrıverdi Aydınov bildirib ki, hazırda bu məsələ üzərində iş gedir və yanvarın 28-də bu say açıqlanacaq.
|
