Media Hüquqları Mərkəzi women-aorum.net saytı ilə birgə dünən "Landmark" biznes mərkəzində "Azərbaycanda söz və ifadə azadlığının vəziyyəti - ölkədə bloggerlik" mövzusunda onlayn konfrans keçirib. Tədbir qurumun sentyabr ayından başlayaraq Bakı, Zaqatala və Şəki şəhərlərində həyata keçirdiyi fəaliyyətin davamı olaraq təşkil olunub.
Bakı - Şəki - Zaqatala online konfransında paytaxtdan və regiondan dəvət olunan bloggerlər, bu sahəni araşdıran ekspertlər, hüquqşünaslar və jurnalistlər iştirak edib. Konfransda Azərbaycanda söz və ifadə azadlığının vəziyyəti, bloggerliyin ənənəvi mediaya verdiyi töhfələr, yeni medianın müxtəlif tərəflərdən ortaya qoyduğu nəticələr, bu fəaliyyətdə media mənsublarının qarşılaşdıqları problemlər, ölkədə sözügedən sahədə vəziyyət, jurnalistlərin hüquqlarının pozulması, eyni zamanda, müdafiə olunması istiqamətində ictimai müzakirə təşkil edilib.
Tədbirdə çıxış edən RATİ-nin nümayəndəsi Rəsul Cəfərov ölkədə söz və ifadə azadlığında ciddi problemlərin hələ də qaldığını qeyd edib. Media FM radiosunun redaktoru Teymur Əliyev bildirib ki, istənilən halda azad fikrin söylənilməsi alqışlanmalıdır, jurnalistin təşəbbüsü olmalıdır.
Media Hüququ İnstitutunun hüquqşünası Fariz Namazov isə Azərbaycanda azad medianın ən böyük problemlərindən biri kimi müstəqil məhkəmə sisteminin, ədalətli məhkəmə araşdırmasının olmamasını vurğulayıb.
Bakı auditoriyasında konfransa qatılan qonaqlar əsasən medianın problemləri, jurnalistlərin qarşılaşdıqları çətinliklər ətrafında fikirlərini iştirakçılarla bölüşüblər. Siyasi yazar Aygün Muradxanlı və bloggerlər Qan Turalı, Rövşən Nəsirli ölkədə tənqidi jurnalistikadan söz açıblar. Vəkil Anar Qasımov söz və ifadə azadlığının müdafiəsində problemlərin olduğunu söyləyib.
|
