Avropa Birliyi ölkələrinin əsas valyutası olan avro mövqeyini itirməkdədir. Dollar isə güclənməkdə davam edir. Əgər avronun zəifləməsi İrlandiyanın müstəqil borc reytinqinin aşağı düşməsi ilə bağlıdırsa, dolların möhkəmlənməsi Koreya yarımadasındakı getdikcə artan gərginliklə əlaqədardır. Mütəxəssislər qeyd edirlər ki, investorlar Avropa liderlərindən regiondakı borc problemləri ilə mübarizədə daha sərt qərarlar gözlədikləri üçün avro yeni ilin əvvəlində həssaslığını saxlayacaq.
Yaponiyanın iri banklarından olan Mizuho Corporate Bankın ekspertləri 2011-ci ildə avronun ucuzlaşacağını proqnozlaşdırır."Reuters" agentliyinin xəbərinə görə, ekspertlər Avropa valyutasının martın sonuna 1,29 dollara, dekabrda isə 1,18 dollara düşəcəyini ehtimal edirlər.
Bankın analitikləri hesab edir ki, avronun dəyərsizləşməsinə avroməkanda mövcud olan borc problemi təkan verəcək. Çünki bu problem Avropa Mərkəzi Bankını monetar siyasətini zəiflətməyə məcbur edəcək. Görünür, avrozonanın borc problemi 2010-cu ilin əsas mövzusu olub. Hazırda diqqət mərkəzində olan Portuqaliya, İtaliya, Yunanıstan və İspaniyada baş verən istənilən kiçicik problem Avropanın maliyyə bazarına mənfi təsir göstərir. Ekspertlərə görə, borc problemlərinin həlli üçün avropalılar il boyu çalışmalı olacaqlar. Əgər borc böhranı dərinləşərsə, bu, avronun ucuzlaşmasına gətirib çıxaracaq.
Beynəlxalq Valyuta Fondunun keçmiş baş iqtisadçısı, hazırda Massacusets İnstitutunda professor Simon Johnson "Azadlıq" radiosuna müsahibəsində bildirib ki, böhranın iki dibi olmayacaq. Yəni böhranın ən pis vəziyyətini artıq gördük:
"Avrozona salamat çıxa biləcək. Ancaq indiki tərkibdə qala biləcəyinə şübhələrim var. İndi Avrozonada 17 ölkə var. Yanvarda Estoniya da qoşuldu. Mən ona da şübhə edirəm ki, bir Avropa ölkəsi borca düşən kimi hamının onun borcuna kömək etməsi siyasəti davam edəcək. Ona görə tərkib, quruluş və siyasət baxımından dəyişiklik olmalıdır. Ancaq prinsipial baxımdan Avrozona qalacaq. Məncə, Avropada vəziyyət 5 ildən sonra aydınlaşacaq. Amma yeni struktur Avrozona ölkələrinin heç də hamısını qane etməyəcək".
|
