Azərbaycan və türk əsilli amerikalılar Xocalı qətliamının 19-cu ildönümü ilə bağlı gələn ay ABŞ-da Xocalı Anım Həftəsi keçirəcək. APA-nın Vaşinqton müxbirinin verdiyi məlumata görə, fevralın 18-26-da Azərbaycan-Amerika Şurası (AAC), Amerika Azərbaycan Cəmiyyəti (ASA) və Toronto Universitetinin Azərbaycanlı Tələbələr Assosiasiyası Şimali Amerikada Xocalı Anım Həftəsi keçirilməsində tərəfdaşlıq edəcəklər.
Bundan əlavə, Azərbaycan Diaspor təşkilatı San-Fransisko, Vaşinqton və Nyu-Yorkda Xocalı Faciəsi mövzusunda dəyirmi masa, debatlar, eləcə də Kanadanın Toronto şəhərində xatirə konfransları təşkil edəcək. Azərbaycanın Dağlıq Qarabağ ərazisində yerləşən və əhalisi azərbaycanlılardan ibarət olan Xocalı şəhəri 1992-ci il fevral ayının 25-dən 26-na keçən gecə Ermənistan Silahlı Qüvvələri tərəfindən işğal edilib. İşğalçı qüvvələr Azərbaycan türklərinin məskunlaşdığı Xocalı şəhərində etnik təmizləmə və soyqırım törədib və nəticədə 613 nəfər öldürülüb. Qətlə yetirilənlərdən 63-ü uşaq, 106-sı qadındır.
|
