Ötən il Azərbaycanda 29 717 406 kvadratmetr ərazi mina və hərbi sursatdan təmizlənib, əməliyyatlar zamanı 64 448 mina və partlamamış hərbi sursat (PHS) aşkar edilərək zərərsizləşdirilib.
Bu barədə Azərbaycan Ərazilərinin Minalardan Təmizlənməsi üzrə Milli Agentlikdən (ANAMA) məlumat verilib.
Əməliyyatlar aparılan ərazilər təhlükəsiz vəziyyətdə yerli icra orqanlarına təhvil verilib. Əməliyyatlar Füzuli, Ağcabədi, Tərtər, Xocavənd, Ağdam, Tovuz və Ağstafa rayonlarında və Bakı şəhərində aparılıb.
Ötən ilin dekabr ayı ərzində isə agentlik tərəfindən 3 072 171 kvadratmetr ərazi təmizlənib. 6 306 PHS və 6 ədəd tank əleyhinə mina aşkar edilərək zərərsizləşdirilib.
Əməliyyatlarda 480 nəfər minaaxtaran mütəxəssis və 120 nəfər yardımçı heyət, 6 mexaniki minatəmizləmə maşını və 37 minaaxtaran it iştirak edib.
Ümumilikdə ANAMA tərəfindən indiyədək 151 820 465 kvadratmetr ərazi təmizlənib. Tapılıb zərərsizləşdirilmiş mina və PHS-lərin sayı 640 589 olub.
2010-cu ilin dekabr ayı ərzində 1 mina/PHS hadisəsi qeydə alınıb. Ümumilikdə ötən il mina və mərmi partlayışları ilə bağlı 4 hadisə qeydə alınıb, nəticədə 4 nəfər zərər çəkib, 1 nəfər isə həlak olub. Həlak olan 1 nəfər hərbçi, zərərçəkənlərdən isə 2-si hərbçi, 2-si isə mülki şəxs olub.
|
