Dövlət Əmək Müfəttişliyi (DƏM) beynəlxalq tələblərə cavab verən strategiya həyata keçirir. Bununla bağlı Fəaliyyət Planına dəstək məqsədi ilə hazırlanmış "Dövlət əmək müfəttişliyinin potensialının artırılması" layihəsinin icrasına başlayıb. 3 illik layihə çərçivəsində yerli və beynəlxalq ekspertlərin Azərbaycanda toplanacağı, müfəttişliyin potensialını gücləndirməyə dəstək məqsədi ilə bəzi işlər görüləcəyi nəzərdə tutulur.
Söhbət peşə qəzaları və xəstəliklərinin azaldılması, iş şəraitinin yaxşılaşdırılması, işəgötürənlər, işçilər və ictimaiyyətin məlumatlandırılma səviyyəsinin artırılması və iş yerlərində qəzaların qarşısının alınma məsələsinə sosial tərəfdaşların (işəgötürənlər birlikləri və həmkarlar ittifaqları) cəlb olunmasından gedir.
Sözügedən layihədə məqsəd əməyin mühafizəsi üzrə norma və standartları inkişaf etdirmək, sosial dialoq üçün şərait yaratmaqdır. Eyni zamanda, hərtərəfli və qarşılayıcı yanaşmalar üzrə imkanların artırılması, laboratoriyaların müasirləşdirilməsi, iş yerlərində əməyin mühafizəsi üzrə standartların tətbiqi və cəmiyyətin məlumatlandırılma səviyyəsinin yüksəldilməsi ilə Dövlət Əmək Müfəttişliyinin potensialının artırılması nəzərdə tutulub.
Bu ilin avqust ayınadək əməyin mühafizəsinə dair qanunvericilik aktları, Dövlət Əmək Müfəttişliyinin (DƏM) əsasnaməsi və təşkilati strukturu üzrə qaydalarla bağlı təkliflər hazırlanacaq. Ölkə səviyyəsində (əməyin mühafizəsi üzrə Milli Şura), regional səviyyədə, sənaye və istehsal sektorları səviyyəsində əməyin mühafizəsi üzrə sosial dialoqun (dövlət, işəgötürənlər və həmkarlar ittifaqları arasında müzakirə) təşkili strukturu nəzərdən keçiriləcək. Əmək müfəttişlərinin təlim ehtiyacları təhlil olunacaq və iş yerləri haqqında məlumat bazası işlənib hazırlanacaqdır.
|
