Parlamentin dünənki iclasında "Azərbaycan Respublikası daxili işlər orqanlarında xidmət keçmə haqqında Əsasnamə"yə əlavələr edildi. Dəyişikliklərə görə, qadın polis əməkdaşları hamiləlik və doğuşa görə ödənişli, uşağın 3 yaşı tamam olanadək ona bilavasitə qulluq etmək üçün qismən ödənişli sosial, habelə həkim məsləhət komissiyasının rəyi əsasında xroniki xəstəliyi olan uşağa qulluq etmək üçün 4 yaşına çatanadək əlavə ödənişsiz məzuniyyət almaq hüququna malikdir. Bu məzuniyyətlər doğuşdan 70 gün əvvəl və doğuşdan 56 təqvim günü müddətində verilir.
Məsələ ilə bağlı çıxış edən Çingiz Qənizadə qadınlara qarşı bu cür humanist addımı müsbət qiymətləndirdi: "Amma layihəyə görə, 4 yaşına qədər ananın uşağa qulluq üçün işləməməsi və staja hesablanması ananın öz arzusu ilə deyil, həkim rəyi əsasında ola bilər. Fikrimcə, bu aradakı 1 illik müddətdə qadın üçün olan digər imtiyazları da özündə saxlamalıdır".
Layihə ilə bağlı sualları cavablandıran Əli Hüseynli bildirdi ki, əslində, bu müddəalar Əmək Məcəlləsində var və təcrübədə tətbiq edilir: "Qadın polis əməkdaşları pensiyaya çıxanda bu 3-4 illik stajdan faydalana bilirlər. Sadəcə, qanunverici müddəaları tətbiq edən sosial orqanlar sahə qanununa müraciət edirlər. Ona görə də bu müddəanı "AR daxili işlər orqanlarında xidmət keçmə haqqında Əsasnamə"yə salmağa ehtiyac yarandı".
|
